काठमाडौं । सरकार सामाजिक सञ्जालप्रति आक्रामक बनेको छ । सामाजिक सञ्जालमा सरकारविरुद्ध स्ट्याटसको वर्षा नै हुन थालेपछि सूचना प्रविधिसम्बन्धी अलग्गै कानुन बनाएर नियमनको तयारीमा समेत छ । उसले संसदमा दर्ता गराएको सूचना प्रविधिसम्बन्धी व्यवस्था गर्न बनेको विधेयकमा सामाजिक सञ्जालको स्ट्याटसमा कसैलाई होच्याउने, झुक्याउने, अपमानित गर्ने आसय प्रकट भएमा पाँच वर्षको कैद सजायँ र १५ लाखसम्म जरिबाना तिर्नुपर्ने छ ।
प्रधानमन्त्री केपी शर्मा ओलीले सोमबार पत्रकार सम्मेलन गरेर सामाजिक सञ्जाल प्रयोगकर्तालाई सामाजिक मर्यादा कायम राख्न अनुरोध गरे । त्यतिमात्रै होइन प्रधानमन्त्री ओलीले सामाजिक सञ्जाललाई गुरु थापेर कस्तो समाज बनाइँदैछ भनेर टिप्पणीसमेत गरे । वेल घेराउ गरेर संसद्मा प्रतिपक्षले बोल्नै नदिएपछि प्रधानमन्त्रीले आकस्मिक पत्रकार सम्मेलन गरेर प्रतिपक्षीसहित पत्रकारसम्मलाई आलोचना गर्न भ्याए । खास गरेर प्रतिपक्षीप्रति आक्रामक देखिएका ओलीले प्रतिक्रियावादीसँग मिलेर लोकतन्त्र मास्न लागेको आरोपित गरे ।
कांग्रेसको बालहठ
प्रधानमन्त्री ओलीले संसद्मा प्रधानमन्त्रीले भन्दा पहिले बोल्न पाउनुपर्छ भन्नु बालहठ भएको बताएका छन् । मंगलबार दिउँसो संसद्मा प्रमुख प्रतिपक्षी दल नेपाली कांग्रेसले प्रधानमन्त्री भन्दा अगाडि बोल्न समय माग गरेकोप्रति लक्षित गर्दै उनले त्यसलाई बालहठको संज्ञा दिएका हुन् । उनले भने, “लोकतान्त्रिक प्रणालीमा प्रधानमन्त्रीले समसामयिक विषयमा आवश्यक परेका बेला संसदलाई विभिन्न विषयमा सरकारको दृष्टिकोण जानकारी गराउने चलन हुन्छ । प्रधानमन्त्रीले लिएको समयभन्दा पहिले आफुले बोल्नुपर्छ भन्ने त्यस्तो बालहठ लोकतन्त्रमा कहीँ पनि हुँदैन ।”
उनले संसदमा बोल्न नपाएकाले आफूले पत्रकार सम्मेलन नगरेको पनि स्पष्ट पारे । संसदमा असंसदीय र अमर्यादित क्रियाकलाप भएको भन्दै उनले त्यसले संकेत गरेका पक्षका बारेमा जानकारी गराउन पत्रकार सम्मेलन गरिएको बताए ।
पत्रकारले भाषा बिगारे !
प्रधानमन्त्री ओलीले पत्रकारहरुले नै भाषा बिगारेको आरोप लगाए । उनले आदरार्थी शब्द प्रयोग नगरेको भन्दै आक्रोश पोखेका थिए । उनले पत्रकारलाई तपाईं भन्न आउँदैन भन्दै प्रश्न गरे । अझ टेलिभिजनले त तपाईं भन्न बिर्सिइसकेको उनको गुनासो थियो ।
“सञ्चार जगतलाई म भन्न चाहन्छु । सञ्चार लोकतन्त्रको एउटा पिलर हो । त्यसैले राज्यको चौंथो अंग भनिन्छ,” उनले भने, “हाम्रो टेलिभिजनले कसैलाई तपाईँ भन्नै जान्दैन । तपाईं भन्ने नेपाली शब्दको भाषै हराइसक्यो । बाउलाई पनि तिमी, हजुरबालाई तिमी, हजुरआमालाई पनि तिमी । यो त नेपाली संस्कृतिभित्र पर्दैन ।”
आफुले यस्तो भन्दा कतिपयलाई मन नपर्ने पनि उनले बताए । स्थापित सञ्चारमाध्यमले पनि सामाजिक सञ्जाललाई पछ्याउनतिर लाग्ने हो भने कस्तो समाज सिर्जना गर्छौ भन्दै ओलीले प्रश्न गरे ।
सञ्चारमाध्यमबाट थाहा पाएँ– गुठी विधेयक फिर्ता भइसकेछ !
प्रधामन्त्री ओलीले गुठी विधेयक फिर्ता भएको बारे आफूले सञ्चारमाध्यमबाट थाहा पाएको बताएका छन् । मन्त्रिपरिषद्को कार्यालय सिंहदरबारमा आयोजित पत्रकार सम्मेलनमा उनले यसो भन्दा धेरैले आश्चर्य मानेका थिए । गुठी विधेयकबारे आइतबार उनले उपत्यकाका जनप्रतिनिधिलाई बोलाएर छलफल गरेका थिए । उनले त्यहाँ पार्टी र क्याबिनेटमा छलफल गरेर निर्णय लिने बताएका थिए ।
तर, पार्टीका नेताहरू र सत्तापक्षकै सांसदहरूको दबाबपछि प्रधानमन्त्रीले मन्त्रीलाई विधेयक फिर्ता दिन निर्देशन दिएको स्रोत बताउँछ । तर, गुठी फिर्ता भएलगत्तै पत्रकार सम्मेलनमा प्रवेश गरेका प्रधानमन्त्रीले सञ्चारमाध्यमबाटै थाहा पाएको अभिव्यक्ति दिएका थिए । प्रधानमन्त्री ओलीले उपत्यकाभित्र र उपत्यकाका बाहिरको गुठीको फरक प्रकृतिको भएको र उपत्यकाबाहिरका गुठीबाट मोहीहरू पीडित रहेको बताएका थिए ।
गुठीहरू संरक्षण गर्न २०३३ सालमा स्थापना भएको गुठीले नसकेको र पटकपटक संरचना फेर्न आवाज उठेकाले सरकारले संवोधन गर्न खोजेको तर भ्रमपूर्ण प्रचार गरिएको उनको भनाइ थियो । उनले प्राधिकरण बनाएर राजगुठी र निजी गुठी मास्न लागियो भन्ने प्रचार गरेर पछाडिबाट प्रोभोक गर्ने तत्व सक्रिय रहेको बताए ।
उनले आन्दोलनको हरियो स्याउलाभित्र हरेउ देखा परेकाले मन्त्रीले विधेयक फिर्ता लिएको र आफूको दृढ समर्थन रहेको उनको भनाइ थियो ।
“लोकतान्त्रिक विरोधी शक्तिले लोकतन्त्रको जरा काट्न कैची चलाउन थालेको देखेर विधेयक फिर्ता लिइएको हो,” उनको भनाइ थियो ।
केही बुद्धिजीवी देख्दा शरम लाग्छ
प्रधानमन्त्री ओली बुद्धिजीवीप्रति फेरि असहिष्णु देखिए । पत्रकार सम्मेलनमा ओलीले बुद्धिजीवीप्रति पुनः तुस पोखे ।
“मैले केही आफूलाई विद्वान भन्नेले बोलेको सुनेको छु । बोलेको सुन्दा शरम लाग्छ । संस्कृतिको रक्षा भन्ने शब्द बोलेको हुन्छ तर त्यहाँ अमर्यादा, अभद्रता, सांस्कृतिको मूल्यको अभाव देखिन्छ । मेरो आग्रह यत्तिमात्रै हो–समाजमा ममात्रै बाँच्नुपर्ने होइन । मैलेमात्रै भविष्य र परिणाम बेहोर्नुपर्ने होइन । हामी सबै परिवारमा समाजमा बाँच्नुपर्छ । आफ्ना कुरा भनौँ । र, मर्यादित बनौँ ।”
यसअघि पनि प्रधानमन्त्री ओलीले बुद्धिजीवीलाई कोट काट्ने मुसा, फोर सीआदि उपमा दिँदै थला बसाल्ने अभिव्यक्ति दिएका थिए ।