काठमाडौं । प्रतिनिधिसभा बैठकमा सभामुख कृष्णबहादुर महराले प्रमुख प्रतिपक्षी दल नेपाली कांग्रेसका सभापति शेरबहादुर देउवालाई बोल्न नदिएको भन्दै प्रवक्ता विश्वप्रकाश शर्माले आक्रोश व्यक्त गरेका छन् ।
मंगलबारको प्रतिनिधिसभा बैठकमा सभामुख महराले सभापति देउवालाई प्रधानमन्त्री केपी शर्मा ओलीभन्दा अगाडि बोल्न नदिएको भन्दै प्रवक्ता शर्माले ट्विटरमार्फत आक्रोश व्यक्त गरेका हुन् ।
उनले सभामुख महरालाई पूर्वशिक्षक भन्दै प्रश्न गरेका छन्, ‘‘प्रश्न अघि हुन्छ कि जवाफ ?’’ प्रवक्ता शर्माले संसदमा प्रतिपक्षमार्फत सडकका आवाज सुनेर सम्बोधन गर्नु प्रधानमन्त्रीको कर्तव्य भएको पनि स्मरण गराएका छन् ।
‘‘समुन्नत लोकतन्त्रमा प्रश्न, जिज्ञासा र जनआवाज पहिले सुनिन्छ । देश फर्केपछि औपचारिक रुपले संसदमा प्रतिपक्षमार्फत सडकका आवाज सुनेर सम्बोधन गर्नु प्रधानमन्त्रीको कर्तव्य हो ! ब्रम्ह ज्ञानी होइन @PM_Nepal ’’, उनले लेखेका छन् ।
