लोकसभा चुनावको अन्तिम चरणको मतदान सम्पन्न भएसँगै भारतीय न्यूज च्यानलहरुले मत सर्वेक्षण जारी गरेका छन् । यदि ती मत सर्वेक्षण चुनावी परिणाममा परिवर्तन भए सत्तारुढ भारतीय जनता पार्टी (भाजपा) नेतृत्वको राष्ट्रिय प्रजातान्त्रिक गठबन्धन (एनडीए) फेरि सत्तामा फिर्ता हुने निश्चित छ । 

मत सर्वेक्षणका अनुसार एनडीएले तीन सय सीटको आंकडा छुन सक्छ । भारतमा सरकार बनाउनका लागि दुई सय ७३ सीटको बहुमत अनिवार्य छ । मत सर्वेक्षणको रूझानलाई एक पटक अलग गरेर पहिले यो हेर्न जरुरी छ कि सत्तारुढ भाजपाले के दाबी गरिरहेको थियो । 

भाजपाले आफू एक्लैको तीन सयभन्दा बढी सीट आउने बताइरहेको थियो । उत्तर प्रदेशमा ७४ भन्दा बढी सीट प्राप्त हुन्छ । २०१४ मा उत्तर प्रदेशमा भाजपा गठबन्धनलाई ७३ सीट मिलेको थियो । तर मेरो हिसाबबाट भाजपालाई उत्तर प्रदेशमा ७४ सीट र केन्द्रमा तीन सय भन्दा बढी सीट दिने कुनै पनि मत सर्वेक्षण अहिलेसम्म देखिएको छैन । 

मत सर्वेक्षणमा भाजपालाई बढी सीट दिइएको छ । तर, यस पटक अन्य दलहरुको स्थिति अत्यन्तै मजबुत छ । भाजपालाई उसका कैयौं साथीहरुले छोडेको साथ नै यसको सबैभन्दा ठूलो कारक हुन सक्छ । अहिले मत सर्वेक्षणमा एनडीए सरकार बनाउँदै गरेको देखिँदै छ तर ठूलो चुनौती यो हुन सक्छ कि यूपीएमाथि क्षेत्रीय पार्टीहरु भारी नहोउन् । भाजपा र कांग्रेस दुबै एनडीए इतर र यूपीए इतर पार्टीलाई कसरी आफूसँग मिलाउने भन्ने प्रयासमा जोडबलका साथ लागिरहेका देखिन्छन् । 

‘नरेन्द्र मोदी फेरि सत्तामा पुग्नै सक्दैनन्’ भन्ने राहुल गान्धीको दाबी गलत सावित हुन्छ । अहिलेसम्मका मत सर्वेक्षणमा भाजपा मजबुत देखिएको छ । तर, केही मत सर्वेक्षणको आंकडा हेर्दा कांग्रेस र क्षेत्रीय पार्टीहरु मिलेर नरेन्द्र मोदीको सत्तामा पुग्ने बाटो रोक्न सक्ने सम्भावना पनि देखिएको छ । 

कसका लागि हात बढाउला भाजपा ?
यदि एनडीएले सरकार गठनका लागि आवश्यक सीट जित्न नसके भाजपाले टीआरएस र जगन मोहन रेड्डीतर्फ हात बढाउनुपर्ने देखिएको छ । चुनाव प्रचारको अन्तिम दिन प्रधानमन्त्रीको उपस्थितिमा आयोजित पत्रकार सम्मेलनमा अध्यक्ष अमित शाहले भाजपाको वैचारिक सोच अपनाउन चाहने पार्टी एनडीए गठबन्धनको साझेदार बन्न सक्ने बताएका थिए । अब भाजपा सरकार गठनका लागि सबै झ्याल–ढोका खुला राख्न सक्छ । 

भाजपामा अन्य पार्टीहरुलाई कसरी यूपीएबाट टाढा गरेर एनडीएमा सहभागी गराउने भन्ने बारेमा रणनीति सुरू भइसकेको छ । कुनै पनि मत सर्वेक्षणले कांग्रेसलाई आफ्नै बलबुतामा तीन सय सीट जित्ने देखाइरहेको छैन । यद्यपि २०१४ मा ४४ सीटमा सीमित रहेको कांग्रेस अहिले राम्रो अवस्थामा भने छ । यो आकडा हेर्दा कांग्रेसको कुनै खेमाबाट राहुल गान्धीको नेतृत्व नराम्रो थियो भन्ने आवाज आउने सम्भावना पनि देखिँदैन । तर, प्रियंका गान्धीबाट अपेक्षा गरे अनुरुप उनी जनतासामु खुलेर आउन नसक्दा अपेक्षाहरु पूरा हुन सकेनन् । 

बंगालमा भाजपा र ममताको लडाईंबाट कसलाई फाइदा ?
मत सर्वेक्षणमा पश्चिम बंगालमा भाजपा दोहोरो अंकमा सीट हासिल गर्ने देखिएको छ । बंगालमा भाजपाले गरेको चुनाव केन्द्रित मेहनत देखेर तृणमूल कांग्रेसका कार्यकर्ताहरु पनि सशंकित थिए । 

भाजपाले १० देखि १५ जना आफ्नो सम्पर्कमा रहेका बताएको थियो । अब कति मानिसहरु कुन पार्टीमा जान्छन् हेर्न भने बाँकी छ । बंगालमा विधानसभा चुनाव नजिकै भएकाले पनि यस्ता गतिविधिहरु हुन सक्छन् । तर, तृणमूल कांग्रेस ( टीएमसी) पनि चुप लागेर बस्ने देखिँदैन । आगामी दिनमा भाजपा र टीएमसीका बीचको द्वन्द्व झनै गहिरो हुने निश्चित छ । 

तेस्रो मोर्चाको अनुहार को हुन्छ भनेर हेर्न चुनावी परिणाम नै कुर्नुपर्ने हुन्छ । यदि कांग्रेसले आवश्यक सीट प्राप्त गरेर ती पार्टीहरुका साथ मिलेर दाबी गर्छ भने सरकार गठनको सम्भावना पनि छ । तर, भाजपाले ती पार्टीहरुलाई फकाएर एनडीएमा सहभागी गराउन अनेक प्रकारका आश्वासन दियो भने उनीहरु भाजपालाई साथ दिने सम्भावना देखिन्छ । 

यहाँ यो पनि बुझ्न जरुरी छ कि अमित शाह र नरेन्द्र मोदीले तेलंगानामा गरेको चुनावी र्यालीमा टीआरएसमाथि आक्रमण गरेनन् । बरु उनीहरुले कांग्रेसमाथि निशाना साँधे । त्यस्तै आन्ध्र प्रदेशमा ‘टारगेट’ वाईएसआरलाई नभएर टीडीपीलाई गरिएको थियो । केँपेनमा पनि सहजै अनुमान लगाउन सकिन्छ कि भाजपा कसको हात समात्न तयार छ । 

ओडिशामा भाजपाले नवीन पटनायकमाथि कडा आलोचना गर्यो र उनलाई भ्रष्टसमेत भन्यो । तर, फानी नामक आँधीपछि ओडिशा पुगेका प्रधानमन्त्रीले नवीन पटनायकको प्रशंसा गरे । बोली र व्यवहारले उनले नवीन पटनायकलाई साथ ल्याउने संकेत गरिरहेको थियो । तमिलनाडुको कुरा गर्नुपर्दा यदि त्यहाँ ६ देखि ७ सीट एनडीएको पक्षमा देखिएका छन् । जुन एआईएडीएमको खाताका सीटहरु हुन् । तमिलनाडुमा यूपीए मजबुत देखिँदै छ ।