कोलम्बो । श्रीलंकाको एउटा चर्चका पादरीले गएको आइतबार बम आक्रमण गर्ने एक जना आतंककारीसँग आफ्नो संवाद भएको दाबी गरेका छन् ।  श्रीलंकाको मट्टकाललाप्पु इलाकामा रहेको सियोन चर्चका पादरी फादर स्टेन्लीले आफूसँग आतंककारीको कुराकानी भएको दाबी गरेका हुन् । 

सो चर्चमा २६ जनाको मृत्यु भएको थियोे । उनका अनुसार सो चर्चका मुख्य पादरी भने अहिले विदेशमा रहेका छन् । त्यसैले ती पादरीले  अहिले सहायकको रुपमा चर्चमा काम गरिरहेका छन् । 

उनको भनाई यस्तो रहेको छ ,‘‘मैले उसँग कुरा गरेको थिएँ । मैले उसलाई चर्चको भित्र बोलाएँ । उसले आउन मानेन । उसले आफू कुनै फोन कलको प्रतिक्षामा भएको बतायो । फोन आउनासाथ आफूले फोन उठाउनुपर्ने बतायो । हाम्रो कार्यालय चर्चको सामुन्नेमा छ ।ऊ त्यही आएर उभिएको थियो । उसले पूजाको काम कतिबेला शुरु हुन्छ भनेर सोध्यो । मैले उसलाई जवाफ दिएँ  र दोस्रो पटकपनि उसलाई चर्चमा बोलाएँ । हामी सधैं सबैको स्वागत गर्छौं । उसले आफ्नो काँधमा एउटा व्याग बोकेको थियो । अगाडि तर्फ क्यामेरा सहितको ब्याग जस्तो देखिन्थ्यो । म त्यतिबेला उसको उदेश्यका बारेमा प्रष्ट थिइन । त्यतिबेला त्यहाँ भएका बच्चाहरुले भनिरहेका छन्, यो काम उसैको हो । जब पूजाको काम शुरु भयो । त्यतिबेला म भित्र छिरेँ । यसको दुई तीन मिनेटमा उसले बाहिर बम पड्कायो । बम चर्चको भित्र पड्केन । थुपै्र बच्चाहरु आफ्नो आइतबारको कक्षापछि चर्चमा आएर पानी पिइरहेका थिए । पानी पिएर नै उनीहरु चर्चको भित्र आउँथे । ती बच्चा र अन्य मानिसहरु त्यतिबेला चर्च भित्र आइरहेका थिए । सोही समयमा बम पड्केको हो । चर्चमा बम पड्केपछि सबैतिर कोलाहलको अवस्था उत्पन्न भयो । धमाकापछि गाडी र जेनेरेटरमा आगलागी भयो । आगोका कारण विस्फोटबाट घाइते भएकाहरुलाई हामीले बचाउन सकेनौं । हामीले केही बच्चाहरुलाई मात्रै जोगाउन सक्यौं । पहिलो धमाका पछि पनि त्यहाँ अन्य धमाका भएका थिए । मैले मान्छेहरुलाई जोगाउन पुरै प्रयास गरेको थिएँ । तर, त्यहाँ सबैथोक आगोमा बदलिएको अवस्था थियो । त्यसैले को मर्यो र को बच्यो भनेर म यता र उता दौडिन थालेँ । मेरी पत्नी र छोरा पनि हराएका थिए । खोजतलास गर्दा उनीहरु एक अस्पतालमा भेटिए । यो आक्रमणमा थुप्रै निर्दोष बच्चाहरुको पनि ज्यान गएको छ ।मलाई यति मात्रै थाहा छ ।’’

सो घटना आफूले गराएको भनेर मंगलबार अन्तर्राष्ट्रिय आतंकवादी संगठन इश्लामिक स्टेटले दाबी गरेको छ । तर श्रीलंका सरकारले भने देशकै जेहादी गुट नेशनल तौहिद जमातको नाम लिँदै आएको छ ।
(बीबीसीबाट)