बिराटनगर । भारतसँग पराजित हुँदै उपाधीबाट बञ्चित नेपाली राष्ट्रिय महिला फुटबल टोलीका प्रशिक्षक हरी खड्काले हारको सबै जिम्मेवारी आफूले लिने बताएका छन् । पाँचौं महिला साफ च्याम्यिनसिप फुटबलमा भारतसँग ३–१ ले पराजित भएपछि प्रशिक्षक खड्काले हारको जिम्मेवारी आफूले लिने बताएका हुन् ।
शारीरिक र टेक्निकल रुपमा अगाडि भारतका खेलाडीबिरुद्ध खेलाडीले केही कमजोरी गर्दा पराजय भोग्नु परेको प्रशिक्षक खड्काको भनाइ छ । “म सम्पूर्ण फुटबल समर्थकसँग माफि माग्छु । खेलाडीले राम्रो खेले । तर केही सिल्ली कमजोरी भयो र हार्न पुग्यौं । यसको जिम्मेवारी प्रशिक्षकका रुपमाम लिन्छु ।”
शुक्रबार घरेलु मैदानमा पहिलो पटक साफ च्याम्पियन बन्ने योजना बनाएको नेपाल अन्ततः भारतसँग स्तब्ध भयो । चौथो पटक फाइनलमा भारतसँग प्रतिस्पर्धा गरेको नेपालले सुरुआती उत्कृष्ट प्रदर्शन गरेपनि दोस्रो हाफमा लय बिगारेको थियो । प्रशिक्षक खड्काले पनि खेलाडीले मजैले खेल्न नसकेको स्वीकार गरे । “डिफेन्सको केही कमजोरी भयो । नहुनु पर्ने गोल भयो । त्यहिले भारतलाई उपाधी जितायो । फुटबल हो गल्ती हुन्छ । तर हाम्रा खेलाडीले गर्नु नहुने गल्ती गरे । जसको कारण भारत हाबी भएको थियो,” प्रशिक्षक खड्काले भने ।
पहिलो हाफ १–१ बराबरी खेलेपनि नेपाल ६३ औं मिनेटमा गोलको शिकार भएपछि दबाबमा आएको थियो । उनले खेलाडीलाई नआत्तिएर यही लय राख्न आग्रह गरेका छन् । अब ओलम्पीक छनोटको तयारीमा जुट्ने बताएका प्रशिक्षक खड्काले महिला फुटबलमा लगानी आवश्यक रहेको बताए । “बिस्तारै महिला फुटबलमा लगानी हुन थालेको छ । एक्सपोजर पाए खेलाडीले अझै राम्रो खेल्नेछन् । ओलम्पिक छनोटमा जानुअघिबाट तयारी गरेर भारतबिरुद्ध खेल्नु ठूलो उपलब्धी हो,” प्रशिक्षक खड्काले भने ।
जितपछि भारतीय टोलीकी प्रशिक्षक मायामोल रक्कीले आफ्नो टिम जितका लागि योग्य रहेको बताइन् । उनले खेल निकै रमाइलो भएको आफ्ना खेलाडी नेपाली दर्शकलाई चिर्न सफल भएको बताइन् । “खेल निकै रोमाञ्चक रह्यो । युवा खेलाडीले घरेलु दर्शक र मैदानलाई चिर्न सके । हामी जितका लागि लायक थियौं,” प्रशिक्षक रक्कीले भनिन् ।
