काठमाडौं । जारी सहिद स्मारक ए डिभिजन लिग फुटबलमा सोमबार गत लिगको च्याम्पियन मनाङ मर्स्याङ्दी क्लब र मच्छिन्द्र क्लबबीचको खेल २-२ गोलको बराबरीमा सकिएको छ । 

उपाधि दाबेदार भएकाले यी दुई टोलीबीचको खेल बहुप्रतिक्षित थियो । त्यहि भएर दशरथ रंगशालामा फुटबल समर्थकको सङख्या केही बढी थियो । विशेषत: मनाङ छोडेर अधिकांश राष्ट्रिय खेलाडी मच्छिन्द्रमा अनुबन्ध भएदेखि नै लिगको यो खेलबारे सर्वत्र चासो थियो । अन्तत: पाँचौं चरणमा आमने-सामने भएका यी दुई टोलीले २-२ को बराबरी खेल्दै १-१ अंक बाँडे । 

खासै प्रतिस्पर्धा नदेखिएको खेलमा अधिकांश समय खेलाडीले फाउल गर्दै बिताए । मनाङले सुरुआती अग्रतालाई जोगाउन जथाभावी बल फाल्दा मच्छिन्द्रले पनि लय समाउन सकेन । पहिलो हाफमा १-० ले पछि परेको मच्छिन्द्रले दोस्रो हाफ सुरु भएको दोस्रो मिनेटमा नै बराबरी गोल फर्कायो । त्यसपछि केही मुभ देखिए पनि खेलाडीको सम्झनलायक प्रदर्शन भने देखिएन । ८२ औं मिनेटमा मच्छिन्द्रले अग्रता बनाउँदा ८८ औं मिनेटमा मनाङले बराबरी पार्‍यो ।

अन्तत: खेल २-२ गोलको बराबरीमा सकियो । त्यसपछि दुबै क्लबका खेलाडीबीच मैदानमा हानहान सुरु भयो । रेफ्री श्रवण कुमार तामाङले खेल सकिएको ह्विसेल बजाए लगत्तै मैदानमा खेलाडी एकअर्काबीच हानहान गर्न थाले । 

मच्छिन्द्रका दिपक राई र मनाङका जगजित श्रेष्ठबाट सुरु भएको हानहानमा अरु खेलाडी पनि थपिए । अवस्था यतिसम्म पुग्यो कि झगडा छुटाउन सुरक्षाकर्मी नै मैदानमा प्रवेश गर्नुपर्‍यो । 

खेलाडीसँगै दुबैतर्फका अफिसियल (क्लबका पदाधिकारी) मैदानमा प्रवेश गरे । मनाङका अफिसियल मैदानमा उग्ररुपमा प्रस्तुत हुँदा मच्छिन्द्रका अफिसियसल झगडा छुटाउन लागि परे । 

केहीबेरको तनावपछि सुरक्षाकर्मीले सबैलाई मैदानबाट हटाए । एकअर्कासँग चिरपरिचित र राष्ट्रिय टोलीबाट खेलिसकेका खेलाडीले मैदानमा देखाएको व्यवहारलाई मच्छिन्द्रका प्रशिक्षक प्रवेश कटुवालले उनकै भाषामा अनुशासनहीनको संज्ञा दिए । उनले यस्ता खेलाडीमाथि कारबाही हुनुपर्ने बताए ।

“फुटबलमा खेलाडी एग्रेसिभ हुनुपर्छ तर हानहानसम्म गर्नुको अवस्था भने दु:खद हो । टेक्निकल एग्रेसिभ हुनुपर्छ,” प्रशिक्षक कटुवालले भने । 

उनले दुबै टोलीका खेलाडीमा टेक्निकल एग्रेसिभ नदेखिएको बताए । मनाङले सुरुआती अग्रता लिँदा आफनो टोलीले अपेक्षाकृत प्रदर्शन गर्न नसकेको बताएका प्रशिक्षक कटुवालले १ अंकले उपाधि होडमा असर गरेको उल्लेख गरे । 

तपाईंको वेञ्‍चको खेलाडी झगडामा सामेल भएको देखिएको थियो ? टिम कन्ट्रोलमा छैन भन्‍ने प्रश्‍नमा उनले भने, “मनाङबाट हाम्रो क्लबमा ६-७ खेलाडी आएका छन् । उनीहरुमा पूर्वक्लबविरुद्ध केही होला । केही भएर छोडेको होला । तर नियत झगडा गर्ने होइन । खेलाडी कन्ट्रोलमा नै छन् । तर झगडा ह्विसेलपछि नै भएको हो । त्यसमा रेफ्रीको भूमिका महत्वपूर्ण हुन्छ । हाम्रो खेलाडी झगडा पर्दा छुटाउन गएको हो ।” 

मनाङका प्रशिक्षक धनेश्वर प्रजापतिले झगडाबारे आफूलाई केही थाहा नभएको प्रतिक्रिया दिए । आफूले खेलाडीलाई समातेको कारण खेलपछि मैदानमा के भयो भनेर थाहा नभएको बताएका उनले झगडा गर्नु राम्रो कार्य नभएको र उनीहरुमाथि कारबाही हुने बताए ।

मच्छिन्द्रका रन्जित धिमाल र कप्तान विराज महर्जन दायाँ र बायाँ हुँदा आफ्ना खेलाडीलाई गोल गर्न समस्या भएको प्रशिक्षक प्रजापतिको भनाई छ । “मच्छिन्द्रको दायाँ र बायाँ रन्जित र विराज छन् । त्यही भएर हामीलाई पछि गोल गर्न समस्या भएको हो । गोल त्यहीबाट निस्कने हो । त्यैपनि खेलाडीले राम्रो खेले,” उनले भने । 

खेल सुरु भएको दोस्रो मिनेटमा नै मनाङले अग्रता लिएको थियो । अन्जन विष्टको क्रसमा विदेशी खेलाडी फेमी जोसवाले गोलपछि मनाङले अग्रता लिएको हो । ४७ औं मिनेटमा सुजल श्रेष्ठले गोलमा मच्छिन्द्रले खेल बराबरी पारेका थिए । 

८२ औं मिनेटमा मनाङका गोलकिपर दिप लामा अघि बढेको मौकामा विदेशी खेलाडी एडिलेजा सोमिडेले गरेको प्रहार गोलमा परिणत भएपछि मच्छिन्द्रले २–१ को अग्रता बनाएको थियो । 

लगत्तै मछिन्द्रका डिफेन्डरले क्लियर गर्न नसकेको बलमा बिमल रानाले गरेको प्रहार गोलमा परिणत भएपछि खेल २-२ को बराबरीमा पुग्यो । इन्जुरी समयमा आक्रमक बनेपनि दुबै टोलीले गोल गर्न नसक्दा खेल बराबरीमा टुंगिएको हो । 

लिग संयोजक सञ्‍जीव मिश्रले झगडाको भिडियो हेरेर दोषी खेलाडीमाथि कारबाही गर्ने बताए ।