काठमाडौं । भौतिक पूर्वाधार तथा यातायात मन्त्रालयले केरुङ–काठमाडौं रेलमार्गको फिजिबिलिटी अध्ययनका लागि तत्काल १७ अर्ब बजेट निकासा गर्न सरकारसँग माग गरेको छ ।  भौतिक पूर्वाधार तथा यातायात मन्त्रालयका सचिव मधुसुदन अधिकारीले चीन सरकारको सहयोगमा प्रि–फिजिबिलिटी अध्ययन सम्पन्न गरेको सो रेलमार्गको फिजिबिलिटी अध्ययनका लागि तत्काल १७ अर्ब बजेट आवश्यक रहेको बताए । 

सोमबार संघीय संसदको अर्थ समितिको बैठकमा बोल्दै सचिव अधिकारीले बजेट अभावमा वीरगञ्ज–काठमाडौं रेलमार्ग निर्माणका लागि फिजिबिलिटी अध्ययनको काम अघि बढाउन नसकिएको पनि स्पष्ट पारे ।  सो रेलमार्गको प्रि–फिजिबिलिटी भारत सरकारको सहयोगमा सम्पन्न गरिएको छ । 

भौतिक मन्त्रालयका अनुसार केरुङ–काठमाडौं रेलमार्ग निर्माणको फिजिविलिटी अध्ययनका लागि करिब ३५ अर्ब लाग्ने अनुमान छ ।  यस्तै वीरगञ्ज–काठमाडौं रेलमार्गको फिजिविलिटी अध्ययनका लागि करिब ७ अर्ब लाग्ने अनुमान मन्त्रालयले गरेको छ । 
सो दुवै रेलमार्गको फिजिविलिटी अध्ययनको काम अघि बढाउन बजेटको अभाव रहेको सचिव अधिकारीको भनाइ छ ।

मन्त्रालयले चालु आर्थिक वर्षको हालसम्म ३८ प्रतिशत पुँजीगत खर्च गरेको पनि समितिलाई जानकारी दिए ।  सचिव अधिकारीले प्रदेश र स्थानीय तहलाई हस्तान्तरण गर्ने काममा ढिलाइ भएकाले पुँजीगत खर्च अपेक्षाअनुसार नभएको बताउँदै बजेट खर्च गर्न नसकिए पनि अब ती योजनाले गति लिने दाबी गरे । 

“चालु आर्थिक वर्षभित्र आफ्नो मन्त्रालयले लक्ष्य अनुसार नै पुँजीगत खर्च गर्ने छ,” सचिव अधिकारीले भने ।

तस्बिर रासस