काठमाडौं । प्रधानमन्त्री केपी शर्मा ओलीले नेकपा प्रदेश कमिटीका सदस्यहरुलाई कुशल संगठक, सहि विचारका संवाहक र अनुशासनका प्रतिमूर्तिका रुपमा समाजमा प्रस्तुत हुन निर्देशन दिएका छन् ।
नेकपा प्रदेश कमिटी प्रदेश नम्वर १ को पहिलो वैठक तथा सपथ ग्रहण समारोहलाई सम्वोधन गर्दै उनले सो निर्देशन दिएको प्रधानमन्त्रीको निजी सचिवालयले जनाएको छ । प्रधानमन्त्री ओलीले सामाजिक चेतना र विकास निर्माणका अभियन्ताका रुपमा सफलता मिलोस भन्ने शुभकामना समेत सो अवसरमा दिएका थिए ।
प्रधानमन्त्री ओलीले अहिलेको सरकारलाई जनताले दुई तिहाई वहुमत दिएको हुनाले यो सरकार नै जनसरकार भएको बताए । “ती जनताकै लागि सरकारले काम गरिरहेकाले यो सरकार नै जनसरकार हो, ” प्रधानमन्त्री ओलीले भने, “कम्युनिष्ट पार्टीको सरकार कस्तो हुन्छ भन्ने कुरा यो सरकारले देखाउने छ ।”
आधुनिक देश,आधुनिक प्रदेश र आधुनिक स्थानीय सरकार कस्तो हुन्छ भन्ने देखाउन त्यहि ढंगले काम गर्न उनले निर्देशन दिए । उनले प्रदेश कमिटीका सदस्यहरुलाई स्थानीय तहलाई निर्देशन कम सुझाव बढि दिन सल्लाह दिएका थिए ।
प्रधानमन्त्री ओलीले आउँदो चुनावमा दुई तिहाई भन्दा वढि मतसहितको सरकार बनाउने दावी समेत गरे । “नेकपा वैचारिक हिसावले स्पष्ट छ ” प्रधानमन्त्रीले भने, “ हरेक राष्ट्रिय मुद्धामा हाम्रो मत स्पष्ट छ ।”
प्रधानमन्त्री ओलीले शास्त्रीय माक्र्सवाद भन्दा आजको समयअनुसार चल्न सक्ने माक्सवाद उपयोग गर्नुपर्नेमा जोड दिए । माक्र्सवाद आजको समयअनुसार चल्न सक्ने सैद्धान्तिक दिशानिर्देश गरेको उनले बताए । वैठकलाई सम्वोधन गर्दै प्रधानमन्त्रीले १नम्बर प्रदेशको धार्मिक र ऐतिहासिकताको चर्चा गरेका थिए ।