काठमाडौं । व्यवस्थापिका–संसद्अन्तर्गत सुशासन तथा अनुगमन समितिको मंगलबार बसेको बैठकले काठमाडौं विश्वविद्यालयको प्रवेश परीक्षामा उठेको विवाद बुझ्न पाँच सदस्यीय उपसमिति गठन गरेको छ । उपसमितिमा उदय नेपाली, पद्मनारायण चौधरी, मिलन राजवंशी, जनक जोशी र नरसिंह चौधरी सदस्य छन् । 

केयुको प्रवेश परीक्षामा अख्तियारको संलग्नता रहेको भन्दै समितिले अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीलाई बैठकमा बोलाएको थियो । तर, उनी अस्वस्थताका कारण ‘बोल्न नसक्ने’ भन्दै बैठकमा उपस्थित भएनन् । अख्तियारका पदाधिकारी भने बैठकमा उपस्थित भएका थिए । 

प्रवेश परीक्षामा अख्तियारको संलग्नतालगायत विषयमा सोधपुछका लागि जारी बैठकमा समितिका सदस्यहरूले संसदीय समिति गठनको माग गरेका थिए । उपसमितिलाई प्रतिवेदन तयारी पार्न १० दिनको समय दिने बैठकले निर्णय गरेको छ ।