काठमाडौं । प्रधानमन्त्री केपी शर्मा ओलीले मुखको तीतो पोख्न छाडेका छैनन् । सरकार सञ्चालनको वर्ष दिन पूरा भएको सन्दर्भमा बोल्दै प्रमुख प्रतिपक्षी र बुद्धिजीबीप्रति खनिएका प्रधानमन्त्री ओली बुधबार सुदूरपश्चिम प्रदेशलाई सम्बोधन गर्ने क्रममा लोक गायक पशुपति शर्माप्रति खनिए ।
उनले लोकगायक पशुपति शर्माले जनतालाई लुटेर खान आकर्षित गर्ने भएकाले जनताले मन नपरेर युट्युबबाट हटाउन लागेको दलिल पेस गरे । “हामी नचाहिने कुरामा रमाउँछौं । नचाहिने कुरामा उत्ताउलिन्छौँ । नचाहिने कुरालाई प्रोत्साहित गर्छौं । एउटाले भुलचुकले एउटा गीत बनाए अरे ! खै कता हो मैले सुनेँ– लुट्–लुट् ! गरिखाएर केही काम लाग्दैन । लुटेर खा भाइ लुटेर खा, लुट भनेर । कसैले गीत गाएर यसो बनायो होला । जनताले मन पराएनन् तिम्रो गीत भनेपछि उनले युट्युबबाट हटाए अरे,” उनको कटाक्ष थियो ।
तर, पशुपति शर्माको गीत जनताले नभई युवा संघका कार्यकर्ताले बन्द गराउन लगाएका थिए । युवा संघका उपाध्यक्ष किरण पौडेलले सामाजिक सञ्जालबाटै गीत बहिस्कार गर्न आह्वान गरेका थिए ।
उनले भनेका थिए, “ पशुपति शर्माका कार्यक्रमहरू आ–आफ्नो ठाउँमा सशक्त बहिस्कार गर्न, गराउनु हुन सम्पूर्ण युवा साथीहरूमा हार्दिक अपिल गर्छु । उनको राजनीतिक झुकाव र चरित्रको विषय सबै प्रष्ट नै छन् । तर, एक व्यावसायिक कलाकारको प्रस्तुतिमा योजनाबद्ध हिसाबले कम्युनिस्ट पार्टीलाई खुइल्याउँदै कंग्रेसको पक्षपोषण गरेको देखिन्छ ।”
हेर्नुहोस् प्रधानमन्त्रीको टिप्पणी
हामी नचाहिने कुरामा रमाउँछौं । नचाहिने कुरामा उत्ताउलिन्छौँ । नचाहिने कुरालाई प्रोत्साहित गर्छौं । एउटाले भुलचुकले एउटा गीत बनाए अरे । खै कता हो मैले सुनेँ– लुट्लुट् ! गरिखाएर केही काम लाग्दैन । लुटेर खा भाइ लुटेर खा, लुट भनेर । कसैले गीत गाएर यसो बनायो होला । जनताले मन पराएनन् तिम्रो गीत भनेपछि उनले युट्युबबाट हटाए अरे ।
अर्को सांसदले त्यस्तो राम्रो महान गीत, लुटेर खान सिकाउने कुराजस्तो गतिलो, नेपालीलाई सुहाउने किन हटाएको युट्युबबाट, राख्नुपर्छ, हाम्रो त बाटै त्यही हो, २५ हजार त्यस गीतवापत पुरस्कार दिन्छु भनेर ।
अचम्म लाग्यो– कता जाँदैछौँ हामी ? उनले भावनामा बगेर एकछिन एउटा गीत लेखे । युट्युबमा पनि हाले । तर, सबैले राम्रो गरेनौ भाइ भनेपछि हटाए । सिध्धियो नि कुरो । सरकारले केही भनेको छैन । सरकारले किन केही भन्नुपर्छ ?
सरकार यत्ति भन्छ– सुबाटोमा हिँडौँ ।
