काठमाडौं । प्रमुख प्रतिपक्षी दल नेपाली कांग्रेसभित्र भ्रातृ संगठन नेपाल विद्यार्थी संघ (नेविसंघ) को विषयमा अन्योल बढीरहेका बेला अध्यक्ष नैनसिंह महर पदबाट राजीनामा दिने मनस्थितिमा पुगेका छन् । पार्टीका नेताहरुबाट आएको ‘प्रेसर’ थेग्न नसकेपछि अध्यक्ष महरले आज दिउँसो पार्टी सभापति शेरबहादुर देउवालाई राजीनामा दिने तयारी गरेका छन् । 

नेविसंघकै विषयमा पार्टीभित्र नेताहरुका बीचमा ‘द्वन्द्व’ देखिएपछि उनले राजीनामा गरेर मार्गप्रसस्त गर्न खोजेको श्रोतको भनाइ छ । श्रोतका अनुसार अध्यक्ष महर राजीनामाका लागि केन्द्रीय कार्यसमितिमा रहेका विद्यार्थी नेताहरुसँग छलफल गरिरहेका छन् । 

उनले आफू पदबाट राजीनामा दिने मनस्थितिमा रहेको र संगठन र पार्टीभित्र छलफल गरिरहेको प्रतिक्रिया दिएका छन् । ‘‘मनस्थिति बनाएको छु । महाधिवेशन गर्ने वातावरण भएन । स्ववियु पनि छ भन्ने । फेरि हाम्रो समय पनि सकियो । अहिले नै क्लियर भएको छैन्, छलफलमा छु’’ अध्यक्ष महरले बाह्रखरीसँग भने । 

यसअघि आइतबार पत्रकार सम्मेलन पछि कांग्रेस प्रवक्ता विश्वप्रकाश शर्माले नेविसंघको विवाद छिट्टै समाधान हुने प्रतिक्रिया दिएका थिए । ‘‘नेविसंघको विवाद टुंगिन्छ । सम्भवत यो विषयमा केन्द्रीय कार्यसमितिले निर्णय गर्नु पर्दैन होला, बाहिर नै समाधान हुन्छ,’’ उनले घुमाउरो पारामा भनेका थिए । 

नेविसंघको विधान संशोधन गरेर थपिएको पाँच महिनाका समयावधी माघ २ गते पूरा भैसकेको थियो । तर पार्टीले माघ १० गते बस्ने केन्द्रीय कार्यसमितिले गर्ने निर्णय बमोजिम हुने गरी नेविसंघको केन्द्रीय कार्यसमितिलाई यथावत राखेको थियो । माघ १० गते सुरु भएको बैठकको निरन्तरता स्वरुप आज पनि कांग्रेस केन्द्रीय कार्यसमिति बैठक बसिरहेको छ ।