काठमाडौं । गृहमन्त्री रामबहादुर थापा ‘बादल’ले सुरक्षित भवन नै अप्रत्यासित जोखिमबाट बच्ने र बचाउने उत्तम उपाय भएको बताएका छन् । बुधबार काठमाडौंको भूगोलपार्कमा आयोजना गरिएको भूकम्प स्मृतिसभामा मन्त्री थापाले यस्तो बताएका हुन् । “प्रकृति र प्राकृतिक संरचनामा मान्छेले दख्खल दिइरहेका कारण कहिलेकाहीँ अप्रत्याशित जोखिम व्यहोर्नुपर्ने अवस्थाबाट बच्न र बचाउने उत्तम उपाय भनेकै सुरक्षित भवन र यसप्रतिको साझा प्रतिवद्धता हो,” मन्त्री थापाले भने ।

१९९० साल माघ २ गतेको भूकम्पले पु¥याएको क्षति सम्झना गर्दै अबका पुस्ताले यस प्रकारको क्षति व्यहोर्नु नपरोस् भनेर सजग गराइराख्न स्मृतिसभा आयोजना गरिएको महानगरपालिकाले बताएको छ । भूकम्पले सिकाएको पाठबाट सुरक्षित बस्ती निर्माणमा पुस्तालाई सहभागी गराउने उद्देश्य राखेर ०५५ सालदेखि हरेक वर्ष माघ २ गते भूकम्प सुरक्षा दिवस मनाउन सुरु गरिएको हो ।

यस वर्षको नारा “विपद्बाट सुरक्षित हुने नागरिक अधिकार, पूरा गर्न जिम्मेवार संघ, प्रदेश र स्थानीय सरकार” रहेको छ । यसैअनुसार बुधबार दिनभर पाटन दरबार र जावलाखेल क्षेत्रमा भूकम्पकेन्द्रित कार्यक्रमहरु हुँदैछन् ।