काठमाडौं । नेपाली कथानक चलचित्र ‘गोपी’ युनिटले प्रदर्शन मिति नजिकिँदै गर्दा संघीय सरकारका मन्त्रीहरुसँगको भेटघाटलाई तीव्र बनाएको छ । मंगलबार श्रम मन्त्री गोकर्ण विष्टलाई भेटेको निर्माण पक्षले आज (बुधबार) कृषि मन्त्रीसँग भेटघाट गरेको छ ।
कृषिमन्त्री चक्रपाणी खनालसँग चलचित्र ‘गोपी’को विषय र नेपाली चलचित्रको अवस्था र सम्भावनाका विषयमा कुराकानी भएको निर्देशक दीपेन्द्र लामाले बताए ।
भेटमा मन्त्री खनालले कुनै समय आफूले मोहनविक्रम सिंहको नाटकमा अभिनय गरेको र चलचित्र ‘आवाज’ का लागि गीत लेखेको प्रसंग सुनाएको लामाले जानकारी दिए ।
“उहाँले कृषिमाथि बनेको चलचित्र ‘गोपी’को सफलताको कामना गर्नुभयो । साथै चलचित्र हेरेर सम्भावित सहकार्य गर्न मन्त्रालय तयार रहेको पनि बताउनुभयो,” निर्देशक लामाले भने ।
श्रममन्त्री विष्टले चलचित्रको ट्रेलर हेरेर हिजो ‘गोप’का निर्देशक, निर्माता तथा कलाकारलाई भेटेर चलचित्रबारे जानकारी लिएका थिए ।
मास्टर्स गरिसकेको युवा स्वेदेशमा गाई पालन गरेर बसेको कथालाई उठान गरेको चलचित्रले अघिल्लो हप्ता प्रचारको नयाँ शैली अपनाउँदै पोखरामा हट एयर बेलुनमा आफ्नो पोस्टर राखेको थियो ।
दीपेन्द्र लामाले निर्देशन गरेको चलचित्रमा विपिन कार्की मुख्य भूमिकामा छन् । चलचित्र माघ १८ गते रिलिज हुँदैछ ।
