काठमाडौं । ने क पाका नेता झलनाथ खनालले मेलम्ची खानेपानी आयोजना घिटिक–घिटिकको अवस्थामा पुगेको बताएका छन् । नेता खनालले नेपालका राष्ट्रिय गौरवका कुनै पनि आयोजनाको प्रगति सन्तोषजनक नदेखिएको समेत दाबी गरेका छन् ।
मङ्गलबार सिंहदरबारमा बसेको संसदीय विकास तथा प्रविधि समिति बैठकमा बोल्दै नेता खनालले यस्तो बताएका हुन् । बैठकमा राष्ट्रिय सतर्कता कन्द्रका सचिव विष्णु ओम बादेले केन्द्रको कार्यसम्पादन पनि प्रस्तुत गरेका छन् ।
केन्द्रले भ्रष्टाचार एवम् आर्थिक अनियमितता हुन सक्ने ६ वटा विषयमा विस्तृत अध्ययन गरिएको बादेले बताए । केन्द्रको यीलगायतका प्रगति विवरणको प्रस्तुति सुनेपछि नेता खनालले उक्त प्रतिक्रिया व्यक्त गरेका हुन् ।
“नेपालका कुनै पनि राष्ट्रिय गौरवका आयोजना निर्माणको प्रगति सन्तोषजनक देखिएको छैन,” नेता खनालले केन्द्रको ध्यानाकर्षण गराउँदै भने, “यस्ता आयोजनामा भएका भ्रष्टाचार र अनियमितता रोक्न केन्द्रले भूमिका खेलोस् ।”
बैठकमा सांसद राजेन्द्र लिङ्देनले मेलम्ची खानेपानीबाट ठेकेदार कम्पनी सीएमसी काम छोडेर भाग्नुमा मन्त्रालयको पनि त्रुटि रहेको बताए ।
कम्पनीले पुस १ गतेभित्र मन्त्रालयले क्षतिपूर्तिवापत ३६ करोड रुपैयाँ दिनुपर्ने बताएको थियो ।
“मन्त्रालयले ठेकेदार कम्पनीलाई समयमै क्षतिपूर्तिबापतको उक्त रकम समयमै नदिएपछि कम्पनी काम छोडेर भाग्न बाध्य भएको हो,” सांसद लिङ्देनले भने, “यसमा मन्त्रालय पनि दोषी छ ।” बैठकमा समिति सभापति कल्याणी खड्काले राष्ट्रिय सतर्कता केन्द्रले आफ्नो परिचय मात्र होइन पहिचान बनाउने खालको काम गर्न सुझाव दिएकी छन् ।