काठमाडौं । चौधौं ढोरपाटन महिला भलिबल क्लब लिग च्याम्पीयसिपप माघ पहिलो सातादेखि सुरु हुने भएको छ । नेपाल भलिबल संघको स्वीकृति र ढोरपाटन क्लबको आयोजनामा माघ पाँचदेखि महिला भलिबल क्लब लिग च्याम्पीयनसिप सुरु हुन लागेको हो ।
आज (शुक्रबार) काठमाडौंमा पत्रकार सम्मेलन गरी आयोजक ढोरपाटन क्लबका अध्यक्ष मनबिर छन्त्यालले महिला भलिबल खेलाडीको विकासका लागि सुरु भएको प्रतियोगिता यो वर्ष नयाँ योजनाका साथ आयोजना गर्न लागेको बताए । “महिला क्लब नहुँदै सुरु गरेको प्रतियोगिताले १४ औं संस्करण आयोजना गर्दैछ,” अध्यक्ष छन्त्यालले भने, “यही प्रतियोगिताबाट धेरै क्षमतावान खेलाडीको उदय भएको छ । आगामी दिनमा भलिबलको विकासका लागि यो प्रतियोगिता महत्वपूर्ण रहने छ ।” उनका अनुसार यो पटकको च्याम्पीयनसिपलाई महाकुम्भ मेलाको रुपमा लिइँदैछ ।
नयाँबसपार्कस्थित ढोरपाटन प्रशिक्षण केन्द्रमा माघ १९ गतेसम्म चल्ने प्रतियोगितामा ३ विभागिय क्लब नेपाल पुलिस, नेपाल आर्मी र एपिएफसँगै न्यु डायमण्ड एकेडेमी, टप्स उच्च मावि पोखरा, श्री गाउँ खेलकुद विकास समिति दाङ, चितवन टाइगर्स, थ्रिस्टार एकेडेमी, पारामाउन्ट बोर्डिङ स्कुल कालिमाटी, सेब स्कुल सामाखुसी र मकवापुरको थाहा नगरपालिका सहभागी हुने पत्रकार सम्मेलनमा जानकारी गराइयो । ११ टोली सहभागी हुने प्रतियोगिताको विजेताले ३ लाख ५० हजार, दोस्रो हुने टोलीले २ लाख, तेस्रो हुने टोलीले १ लाख रुपैयाँ पुरस्कारसहित ट्रफी र मेडल पाउने छन् । चौथो हुने टोलीले ६० हजार, पाँचौं हुने टोलीले ४० हजार, छैटौं हुने टोलीले ३० हजार र सातौं स्थानमा ओगट्ने टोलीले २० हजार पुरस्कार पाउने आयोजकले जनाएको छ । व्यक्तिगत विधातर्फ उत्कृष्ट प्रशिक्षक, स्पाइकर, डिफेन्स, ब्लकर, सर्भर र सेटरले जनही ६ हजार रुपैयाँ पुरस्कार पाउने छन् । उत्कृष्ट खेलाडी, उदीयमान खेलाडी, वर्ष खेलाडी, प्लेयर अफ दि सिरिज र भाग्यमानी १ दर्शकले सुजकी स्कुटी उपहार पाउने आयोजक ढोरपाटन क्लबले जनाएको छ ।
कार्यक्रममा ढोरपाटन क्लब र सुजुकी स्कुटीबीच प्रायोजन सम्झौता पनि भएको थियो । आगामी ३ वर्षका लागि भएको सम्झौतामा सुजुकी स्कुटीका मार्केटिङ म्यानेजर नवराज कोइराला र क्लबका अध्यक्ष मनबिर छन्त्यालले हस्ताक्षर गरेका थिए । सम्झौताअनुसार सुजुकीले ढोरपाटनलाई ५० प्रतिशत छुटमा पाँच स्कुटी उपलब्ध गराउनेछ ।