राजस्थान । भारतको राजस्थान राज्यमा शुक्रबार भइरहेको विधानसभा निर्वाचनमा आफ्नो क्षेत्रमा सरकारले सडक नबनाइदिएको भनेर बसेडी क्षेत्रका जनताले निर्वाचन नै बहिस्कार गरेका छन् । मतदान कार्य आज बिहान ८ बजेदेखि बेलुका ५ बजे सम्म जारी रहने छ । यद्यपि स्थानीय बासिन्दाले दिउँसोसम्म मतदानमा भाग नलिने भनिरहेका थिए । उनीहरुलाई स्थानीय प्रशासनले फकाएर मतदानमा गइदिन आग्रह गरेको छ ।
बसेडी विधानसभा क्षेत्रको बुथ नम्बर १९ र २०मा मतदानका लागि दिउँसो सम्म १ जना पनि गएका थिएनन् । सर्वसाधारणले आफूहरुलाई लिखित रुपमा सडक बनाउने आश्वासन नदिएसम्म मतदानमा भाग नलिने जनाएका छन् । उनीहरुले स्थानीय एकटा गाउँबाट जगनेर भन्ने अर्को गाउँसम्म सडक बनाइदिनुपर्ने माग गरेका छन् । यसैगरी झोटोली गाउँमा पनि एक जना बाहेक सबैले मतदान बहिस्कार गरेका छन् । त्यहाँका स्थानीय बासिन्दाले भने यथेष्ट पानी आपूर्तिको माग गर्दै मतदानमा भाग नलिएको बताइएको छ । सो क्षेत्रमा जल उपभोक्ता संगम समितिका अध्यक्ष घासीलाल १ जनाले मात्रै मतदान गरेका थिए ।
(एजेन्सी)