काठमाडौं । भुटानको नयाँ सरकारले पनि छिमेकी भारतलाई नचिढ्याउने रणनीति बनाएको पाइएको छ । चुनावको बेलामा भारतको इच्छा विपरीत चीनसँग कूटनीतिक सम्बन्ध स्थापनाको चर्चा भए पनि भुटानका विदेशमन्त्री टेण्डी दोर्जीले अहिलेलाई नयाँ कूटनीतिक सम्बन्ध स्थापनाको सम्भावना नरहेको जनाएका छन् । उनले भारतीय पत्रिका द हिन्दूलाई दिएको अन्तर्वार्तामा सो कुरा बताएका हुन् ।
हालैको निर्वाचनमा नयाँ दलका ड्रुक न्यामरुप सोग्पाले विजय हासिल गरेपछि सो पार्टीका नेता डा लोटे छिरिङ भुटानको प्रधानमन्त्री भएका छन् । उनले यही डिसेम्बर महिनाको अन्तिममा आफ्नो पहिलो विदेश भ्रमण भारतबाट गर्ने भएका छन् । उनले भारतका प्रधानमन्त्री नरेन्द्र मोदीलाई पनि भुटान भ्रमणको निम्तो दिने जनाइएको छ ।
भुटानका विदेशमन्त्री दोर्जीले आफ्नो देशको संयुक्त राष्ट्र संघको सुरक्षा परिषद्का सदस्य राष्ट्रहरुसँग कूटनीतिक सम्बन्ध स्थापना नगर्ने पहिलाको नीति कायम रहेको जनाएका छन् ।
