एजेन्सी । अष्ट्रेलिया र अमेरिकापछि न्युजिल्यान्डले पनि आफ्ना ठूला टेलिकम उद्योगहरुलाई फाइभ–जी माबाइल नेटवर्कका लागि चिनियाँ कम्पनी हुवावेका उपकरण प्रयोग नगर्न निर्देशन दिएको छ । आगामी पिँढीको वायरलेस टेक्नोलोजी फाइभ–जी निर्माणमा हुवावे विश्वव्यापी प्रतिस्पर्धाका लागि तयार भइरहेपनि राष्ट्रिय सुरक्षाको विषय उठाउँदै विभिन्न देशले यसको प्रस्ताव रद्द गराइरहेका छन् ।
यसरी न्युजिल्यान्डमा पनि खुफिया एजेन्सीका निर्देशक एन्ड्रयु हम्पसले देशका सबै ठूला संचार कम्पनीलाई हुवावेको फाइभजी उपकरण जडान नगर्न भनेको संचार माध्यम सिएनएनले जनाएको छ । हुवावे चीनको सबैभन्दा ठूलो संचार तथा स्मार्टफोन कम्पनी भएको हुँदा फइभ–जी प्रविधिकै लागि यसले भारी लगानी गरिरहेको छ । यस्तोमा सबैभन्दा पहिले फाइभजी निर्माण गर्ने प्रतिस्पर्धामा हुवावे स्वीडेनको एरिक, फिन्ल्यान्डको नोकिया लगायतका कम्पनीहहरु विरुद्ध अगाडि बढिरहेको छ । अहिले भने हुवावेले न्युजिल्यान्डसँगको यो अवस्था निरीक्षण गरिरहेको बताएको छ ।
यो भन्दा अगाडि अष्ट्रेलिया र अमेरिकले पनि हुवावेलाई आफ्नो देशमा फाइभजी प्रविधि प्रदान गर्नमा रोक लगाएका थिए भने बेलयतले पनि सो कम्पनी राष्ट्रिय सुरक्षाका हिसबाले संभावित खतरा हुन सक्ने चेतावनी दिँदै आएको छ । अमेरिकाले त हुवावेका उत्पादनमा सन् २०१२ देखि नै प्रतिबन्ध लगाएको हो । यस्तोमा अमेरिकी कानुन निर्माणकर्ताहरुले क्यानडा र जर्मनीलाई पनि हुवावेको प्रस्ताव रद्द गर्न दबाब दिइरहेका छन् ।
तर कतिपय देशहरुमा भने हुवावेले फाइभजी उपकरण तैनाथ गराइसकेको बताएको छ । यसै प्रविधिका निम्ति अहिलेसम्म २० भन्दा बढी व्यवसायिक सम्झौता भइसकेको तर यसमा संलग्न कम्पनी र देशको नाम भने सार्वजानिक नगर्ने बताइएको हो ।