गाजीयावाद । खाडी क्षेत्रमा कामका लागि जान लागेका २८ जना नेपाली महिला बसेको स्थानमा सोमबार राति प्रहरीले छापा मारेर उनीहरुसँग बयान लिएको छ । विगत अढाई महिनादेखि उनीहरुलाई दलालले कामको लागि खाडी पठाउँछु भन्ने प्रलोभन देखाएर त्यहाँ राखेका थिए ।
भारतको गाजीयावादको इन्दिरापुरमबाट भारतीय प्रहरीले उनीहरुलाई नियन्त्रणमा लिएको हो । समाचार एजेन्सीहरुका अनुसार भारतीय प्रहरीले उनीहरु बसेको स्थानमा छापा मार्दा त्यहाँ २०–३० वर्षका २८ जना नेपाली युवतीहरु फेला परेको बताइएको छ ।
उनीहरु सार्जन विहार समाजको न्याय खण्ड दुईबाट नियन्त्रणमा लिइएका हुन् । उनीहरुलाई खाडीमा काम दिलाइदिने प्रलोभन देखाएर त्यहाँ पुर्याइएको प्रहरीले जनाएको छ । प्रहरीले नियन्त्रणमा लिइएका युवतीहरुको बयानका आधारमा केदार नामका एक व्यक्ति र उनका सहयोगीहरुलाई समेत नियन्त्रणमा लिएको छ ।
एसएसपी वैभव कृष्णका अनुसार ती महिलाहरुलाई अढाई महिनादेखि अल्मल्याएर राखिएको थियो । ती महिलाहरु मध्येका दुई जना आफूलाई दलालको नियन्त्रणबाट उम्काएर दिल्लीको गीता कोलोनीमा पुगेका थिए । ती दुई महिलाले आफूसँग आएका दिदीबहिनीको समस्याका बारेमा त्यहाँ कुरा गरेका थिए ।
उनीहरुले केही मोबाइल नम्बर पनि दिएर प्रहरीमा उजुरी गरेपछि दिल्ली प्रहरीले गाजीयावाद प्रहरीलाई सूचित गरेको थियो । सोही बमोजिम उक्त फ्ल्याटमा प्रहरीले छापा मारेर महिलाहरुको उद्धार गरेको हो । यो प्रकरणलाई सेक्स र्याकेटको कोणबाट पनि अनुसन्धान भइरहेको प्रहरीले जनाएको छ ।