बेइजिङ । चीनले अमेरिकाले ताइवानलाई गर्ने सहयोगप्रति चीनले आपत्ति जनाएको छ । अमेरिकाले दिएको यस्तो फन्डिङले ताइवानलाई ‘खतरनाक अवस्थामा पुर्याएको’ दाबी गर्दै चीनले आपत्ति जनाएको हो ।
अमेरिकी विदेशमन्त्री एन्टोनी ब्लिंकेन चीनको भ्रमणका क्रममा बुधबार नै चीन पुगेका छन् । सोही बेला चीनले सार्वजनिक रूपमा ताइवानलाई अमेरिकाले गर्ने सहयोगप्रति आपत्ति जनाउँदै चेतावनी समेत दिएको हो ।
अमेरिकाका दुवै सदनबाट पास भएको वैदेशिक सहायतासम्बन्धी विधेयकमा बुधबार नै अमेरिकी राष्ट्रपति जो बाइडेनले हस्ताक्षर गरिसकेकोले सोसम्बन्धी विधेयक कानुन बनिसकेको छ ।
चीनले सम्पूर्ण ताइवान आफ्नै भू–भाग भएको र आवश्यक परेमा बल प्रयोग गरेर लिने समेत चेतावनी दिएको छ । चीनको मेनल्याण्डस्थित ताइवान मामिला हेर्ने कार्यालयले अहिले छुट्याइएको अमेरिकी सहयोग प्याकेजले अमेरिकाले चीनसँग जनाएको प्रतिबद्धताको उल्लंघन भएको जिकिर गरेको छ । यसले ताइवानका पृथकतावादी शक्तिलाई गलत सन्देश दिएको उसको दाबी छ ।
सो कार्यालयका प्रवक्ता झू फेंगलियानले ताइवानको सत्तारुढ डेमोक्रेटिक प्रोग्रेसिभ पार्टीले ताइवानलाई खतरनाक अवस्थामा पु¥याउन खोजेको आरोप लगाए । एपी
