काठमाडौं । उषा नेपालद्वारा लिखित पुस्तक ‘पहिलो महिला सीडीओ’ बजारमा आएको छ । नेपालको पहिलो महिला सीडीओ नेपालद्वारा लिखित यो पुस्तक आत्मवृतान्त हो ।
शताब्दी पुरुष सत्यमोहन जोशी, पूर्व गृहमन्त्री योगप्रसाद उपाध्य, पूर्व उपप्रधानमन्त्री भरतमोहन अधिकारी, पूर्व राजदूत कमल कोइराला तथा समाजसेवी शान्ति घिमिरेले संयुक्त रुपमा पुस्तक लोकार्पण गरे ।
पुस्तकबारे बोल्दै शताब्दी पुरुष सत्यमोहन जोशीले लेखक निडर र साहसको प्रतीकका रुपमा तत्कालिन अवस्थामा चिरपरिचित अनुहार रहेको र वर्तमान समयमा बजारमा आएको पुस्तकले नेपाली समाजको तत्कालिन समयमा महिलाले भोग्नुपरेको समस्याको चित्रण, उल्झन गर्दै सफलताको पाठ पढाउने बताए । पूर्व उपप्रधानमन्त्री भरतमोहन अधिकारीले घोष्ट राइटिङ नेपालले केही समय अघिमात्र आफ्नो पुुस्तक संसददेखि संविधानसम्म ल्याएको स्मरण गरे ।
पूर्व गृहमन्त्री योगप्रसाद उपाध्यायले आफूले महिलालाई नभएर काबिल मान्छेलाई सीडीओ बनाएकोमा सरकारी भान्जीको उपाधि पाएको बताए । पूर्व राजदूत कमल कोइरालाले पुस्तकले नेपाली समाजको नेपाली महिलाको लागि प्रेरणा दिएको बताए । समाजसेवी शान्ति घिमिरेले उषाको जीवनबाट नेपाली महिलाले संघर्षको पाठ सिक्ने दस्तावेजको रुपमा पुस्तक आएको बताइन् ।
घोष्ट राइटिङ नेपालका अध्यक्ष कमल ढकालले नेपाली समाजको इतिहास बनाउन आफूहरुले हरेक व्यक्तिको किताब तयार गरिरहेको र त्यो साना– ठूलो समाजको पहिलो दोस्रो नभनी अगाडि बढिरहेकोमा उषा नेपालको पुस्तकले नेपाली समाजको महिला मनोविज्ञान उच्च पार्ने बताए ।
लेखक उषा नेपालले आफू एकल महिला भएको र त्यो १३ दिनको किरिया बस्दा र सेतो कपडा लगाउँदा फिल नहुने तर समाजले र घरले विधवाको व्यवहार गर्दै गएपछि फिल हुने बताउँदै पढाइले मात्र नेपाली महिला अगाडि जान सक्ने बताइन् ।
पुस्तकको मूल्य ३५० रुपैयाँ रहेको छ ।
