काठमाडौं । नेपाली राष्ट्रिय फुटबल टोलीका मुख्य प्रशिक्षक अब्दुल्लाह अल्मुताइरीले युवा खेलाडीहरुलाई अष्ट्रेलियाविरुद्वको खेलमा उत्कृष्ट प्रदर्शन गर्ने मौका रहेको बताए ।
उनले नेपाली टोलीमा युवाहरुको प्रभाव जमाउने अवसर आएकको हुनाले उनीहरुलाई खेलमा महत्व दिने र युवा खेलाडीले उत्कृष्ट प्रदर्शन गर्ने मौका पनि रहेको बताए ।
“युवा खेलाडीले उत्कृष्ट प्रदर्शन गरे खेल निकै राम्रो देखिने छ । मलाई थाँहा छ अष्ट्रेलिया जस्तो देशसँग खेल्न निकै चुनौती छ । तर, हाम्रो लागि यो खेल निकै महत्वपूर्ण छ,” प्रशिक्षक अल्मुताइरीले प्रि–म्याच कन्फ्रेन्समा भने ।
नेपालले सन् २०२२ को विश्वकप छनोट र २०२३ को एसियाक कछ छनोट अन्तर्गत समूह चरणको आफ्नो अन्तिम खेल खेल्दैछ ।
नेपालले भोलि (शुक्रबार) अष्ट्रेलियासँग खेल्न लागेको हो । नेपाल र अष्ट्रेलियाबीचको खेल नेपाली समय अनुसार राती ९ः१५ मा हुनेछ । यसअघिका खेलहरुमा नेपालले दुई खेलमा मात्र जित निकालेको छ ।
नेपालले दुबै खेलमा चाइनिज ताइपेइलाई २–० गोलको अन्तरले हराएको हो । त्यस बाहेकका खेलमा नेपााल पराजित छ । नेपालको विश्वकप छनोटका लागि अघिल्लो चरण प्रवेशको सम्भावना सकि सकेको छ ।
“आशा गरौ हामी अष्ट्रेलियाविरुद्ध एक उत्कृष्ट खेल पस्कने छौं । हाम्रो खेल्ने तरिकामा सुधार ल्याउँदै समर्थकलाई खुसी बनाउने योजना हाम्रो रहेको छ,” अल्मुताइरीले भने ।
यता अष्ट्रेलियाका प्रशिक्षक जर्हाम अर्नाेल्डले नेपाली टोली एकदमै मेहेनती रहेको बताए । उनले आफूहरु नेपालसँग खेल्नका लागि उत्साहित भएको पनि बताए ।
“नेपाली टोलीको खेल्ने तरिका धेरै राम्रो छ । नेपाली टोलीका प्रशिक्षकले पनि टिमलाई राम्रो बनाइ रहेका छन् । हामी नेपालको खेललाई सम्मान गर्दछौँ । र खेलका लागि उत्साहित छौं,” अर्नेल्डले भने ।
