काठमाडौं । कुख्यात आतंकवादी संगठन इस्लामिक स्टेट (आईएस) ले सिरियाको डेर अल जोर प्रान्तमा आफ्नो संगठनका ११ सदस्यहरूलाई फाँसी दिएको छ । 
बेलायतस्थित मानवाधिकार संस्था सिरियन अब्जर्वेटरी फर ह्युमन राइट्सले उक्त कुरा जनाएको हो । आईएसले कसलाई र किन फाँसी दियो भन्ने कुरा थाहा हुन सकेको छैन । आईएसले गत महिना यही प्रान्तमा बलात्कार, हत्या र हतियारहरूको तस्करी गरेको आरोपमा आफ्नो संगठनका २५ सदस्यहरूको हत्या गरेको थियो ।
यसैबीच अमेरिका र अस्ट्रेलियाका अधिकारीहरूले आइएसआइएसका विदेशी लडाकूहरू पश्चिम एसियादेखि दक्षिणपूर्व एसियातिर फर्केर जान सक्ने र आफ्नो देशमा पुगेर आतंकवादी क्रियाकलापमा संलग्न हुन सक्ने भन्दै सम्बन्धित देशहरूलाई सतर्क गराएका छन् । यस्तो चेतावनी अस्ति लन्डनमा भएको आक्रमण र फिलिपिन्समा बढिरहेको जेहादी खतराबीच आएको हो । लन्डनमा अस्ति भएको घटनाको जिम्मेवारी इस्लामिक स्टेटले लिएको छ ।