काठमाडौं । नेपाल राष्ट्र बैंकले भारतको केन्द्रीय बैंक रिजर्भ बैंक अफ इन्डिया (आरबीआई) सँग छलफल गरेपछिमात्र ५ सय र १ हजार भारु नोटको विषयमा निर्णय हुने बताएको छ ।

भारतले कालो धन र जाली नोट निषेध गर्न तथा आतंकवाद नियन्त्रणका लागि देशभर ५ सय र १ हजारका नोट मंगलबार मध्य रातदेखि नचल्ने घोषणा गरेपछि त्यसको असर नेपालमा पनि परेको छ । भारतमा ५ सय र १ हजार भारुलाई प्रतिबन्ध लगाएपछि राष्ट्र बैंकले बुधबार अर्को व्यवस्था नभएसम्म कारोबारमा बन्देज लगाएको छ । 

“भारतमा प्रतिबन्ध भएपछि हामीले ५ सय र १ हजार भारु सटहीमा बन्देज लगाइसकेका छौं,” राष्ट्र बैंकका प्रवक्ता नारायण पौडेलले भने, “अर्को व्यवस्था नभएसम्म भारुको विषयमा निर्णय हुँदैन ।” उनका अनुसार आरबीआईसँग छलफल गरेपछि मात्र नेपालमा रहेका ५ सय र १ हजार रुपैयाँ दरका भारु खिच्ने वा अन्य व्यवस्था हुनेछ ।  “अहिले नै यसै हुन्छ भन्ने अवस्था छैन । “आरबीआईसँग कुरा भएपछि यस विषयमा निर्णय हुन्छ, आफूसँग भएको भारु राख्नुको विकल्प छैन अहिले,” पौडेलले थपे ।

दुई देशको सीमा क्षेत्र र काठमाडौं उपत्यकालगायत प्रमुख व्यापारिक केन्द्रमा भारु कारोबार हुने गरेको छ । यसले गर्दा व्यापारीमा पनि अन्योल देखिएको छ । भारतले बुधबार सबै बैंकहरू बन्द गरेको छ भने बिहीबारसम्म एटीएम पनि बन्द हुनेछन् । 

नेपालमा चालू आर्थिक वर्षको भदौसम्ममा नेपाल राष्ट्र बैंकले ६४ करोड अमेरिकी डलर बेचेर ४२ अर्ब ८३ करोड भारु खरिद गरेको थियो । असोजको विवरण आउन बाँकी रहेकाले भारु सञ्चित योभन्दा बढी छ । नेपालमा १ हजार र ५ सय भारु भारतसँग मात्र कारोबार हुने भएपछि नेपाल राष्ट्र बैंकले त्यहाँको रिजर्भ बैंक अफ इन्डिया (आरबीआई) लाई डलर बेचेर भारु खरिद गर्दै आएको थियो । नेपालको कुल व्यापारको ६५ प्रतिशतभन्दा बढी भारतसँग छ । बैंकका अतिरिक्त व्यक्तिसँग पनि धेरै भारु सञ्चित रहेको अनुमान छ ।