काठमाडौं । भ्रष्टाचारको आरोपमा आलोचित दक्षिण अफ्रिकाका राष्ट्रपति ज्याकोब जुमाले आफूलाई जेल जान कुनै डर नभएको बताएको बीबीसीले जनाएको छ । उनले भ्रष्टाचार गरेको हुन सक्ने  सम्भावित प्रमाण भेटिएको केही दिनपछाडि उनको यस्तो भनाइ आएको बताइएको छ ।

हालै सार्वजनिक एक छानबिन रिपोर्टले राष्ट्रपतिविरुद्ध न्यायिक छानबिन गर्ने आदेश दिएको छ । राष्ट्रपति जुमामाथि ठूला उद्योगी–व्यापारीसँग अनुचित सम्बन्ध राखेको आरोप लगाइएको छ । तर, उनले यसलाई अस्वीकार गर्दै आएका छन् ।

हजारौं दक्षिण अफ्रिकी जनताहरुले उनको राजीनामा माग्दै बुधार सडक प्रदर्शन  गरेका थिए । हालै सार्वजनिक ३६५ पेजको एक रिपोर्टले राष्ट्रपति जुमाले उनको पारिवारिक सम्बन्ध भएका धनी भारतीय व्यापारी गुप्ता दाजुभाइले उनको क्याबिनेट नियुक्तिमा प्रभाव पार्न अनुमति दिएको भन्ने आरोप लगाइएको छ । 

तर, यस विषयमा गुप्ता दाजुभाइको कुनै प्रतिक्रिया आएको छैन ।