काठमाडौं । दक्षिण कोरियाका हजारौं जनताले राष्ट्रपति पार्क गेउ हेविरुद्ध भ्रष्टाचारको आरोपमा राजीनामा माग गर्दै राजधानी सउलमा विशाल विरोध प्रदर्शन गरेका छन् ।

राष्ट्रपतिलाई उनकी एक पुरानी साथी तथा धार्मिक नेताकी छोरी चोइ सुन सिलको प्रभावमा परेर काम गरेको आरोप लगाइएको छ । चोइ सुन सिलले दशौं लाख डलरको बिजनेस उनी सम्बद्ध संस्थाहरुलाई दिन राष्ट्रपतिलाई दबाब दिएको, राष्ट्रपतिका सल्लाहकार नियुक्तिमा हस्तक्षेप गरेको, राष्ट्रपतिको पोशाकसमेत छनोटमा हस्तक्षेप गरेको बताइएको छ ।

राष्ट्रपतिले यस विषयमा शुक्रबार राष्ट्रव्यापी प्रत्यक्ष टेलिभिजन प्रशारणमार्फत जनतासँग माफी मागेकी थिइन् ।

जनतालाई सम्बोधन गर्दा उनी निकै भावुक भएकी बताइएको छ । उनले आफ्नो साथीसँग सम्बन्ध राखेर गल्ति गरेको बताएकी थिइन् । उनले चोइलाई आफ्नो भाषण सम्पादन गर्न दिएको पनि स्विकारेकी थिइन् ।

चोइलाई बिहीबार पक्राउ गरिएको छ र  जालसाझी र शक्तिको दुरुपयोग गरेको आरोप लगाइएको छ ।