काठमाडौं । अमेरिकामा राष्ट्रपति पदको चुनावी प्रचार अन्तिम दौरानमा आइपुगेको छ ।

डेमोक्रेटिक तथा रिपब्लिकन पार्टीको उमेदवारहरू मतदातालाई रिझाउने कोही कसर बाँकी नराखेको बीबीसीले जनाएको छ ।

तथापी हिलारी क्लिन्टन उनकोे प्रतिद्वन्द्वी डोनल्ड ट्रम्प माथि केही अग्रता हासिल गरिरहेकी मत सर्बेक्षणहरुले देखाएका छन् ।

गते हप्ता जब अमेरिकी जाँच संस्था एफबीआईले हिलारी क्लिन्टनको ईमेल जाँच फेरी सुरू गर्ने निर्णय सार्वजनिक भएपछि क्लिन्टनको अग्रतामा तल झरेको बताइएको थियो ।

केही दिन अघिमात्र एक मत सर्बेक्षणले डोनल्ड ट्रम्पले क्लिन्टनसंग एक अंकको अग्रता लिएको सर्बाजनिक भएको थियो । तर पछिल्लो एक सर्वेक्षणले हिलारीले ट्रम्पमाथि तीन अंकको अग्रता लिएको देखाएको छ ।

सर्वेक्षणका अनुसार हिलारीलाई ४७  प्रतिशत र डोनल्ड ट्रम्पलाई ४४ प्रतिशत मतदाताको सर्मथन प्राप्त छ ।

पछिल्ला दिनमा दुवै उमेदवारहरु अहम मानिएका राज्यहरूमा केन्द्रित भएर लगातार चुनावी सभाहरू गरिरहेका छन् । जसमा पेन्सिलभेनिया, ओहायो, मिशिगन, न्यूह्याप्सेयर रहेका छन् ।

दुबै उमेदवारहरुको रणनिती अनिर्णीत मतदाताहरूलाई आफ्नो पक्षमा तान्ने रहेको छ । जसका लागि दुवै उमेदवारहरू आफनो चुनावी सभामा एक अर्काका ‘कमजोरी’ लाई उजागर गर्नमा सक्रिय छन् ।

हिलारी क्लिन्टनले पीट्सबर्गमा आयोजित एक सभामा ट्रम्पको बारेमा मतदातलाई सचेत हुन आग्रह गरिन ।

उनले भनिन्, “बिचार गर्नुहोस् ट्रम्प महिलालाई अपमान गर्छन्,  मजदुरलाई घृणा गर्छन्, आप्रवासी, मुसलमानको बारेमा अपमानजनक कुरा गर्छन् भने यस्ता व्यक्तिले वाशिङगटनमा राष्ट्रपतिको रुपमा शपथ लिँदै गर्दा के होला । उनी सबैलाई जोड्नु सट्टा मानिसलाई फुटाउने काम गर्छन् । बिचार गर्नुहोस सानो कुरामा भड्कीने यस्ता व्यक्तिको हातमा परमाणु बमको कोड हात पर्दा के होला ?”

उता डोनल्ड ट्रम्पले पनि हिलारी क्लिन्टनको ‘कमजोरी’ को चर्चा गर्दै थाकेका छैनन् ।

न्यू ह्याम्पसेयरमा आयोजित एक सभालाई सम्बोन गर्दै डोनल्ड ट्रम्पले भने, “हिलेरी क्लिन्टनको बिरुद्ध धेरै आपराधिक मामलाहरुमा एफबीआईले जाँच गरिरहेको छ । जसमा छ लाख ५० हजार इमेलको पनि मुद्दा संलग्न छ । साथै उनी विदेश मन्त्री पदमा हुँदाका विषय पनि त्यसमा सामेल छन् । हिलारी क्लिन्टनले सबै इमेल विदेश मन्त्रालयलाई सुम्पेको भनेर संसद समक्ष झुठो बोलेकी थिइन्

। के हामी जसको बिरुद्ध आपराधिक मुद्दा चलीरहेको छ अब यस्तो व्यक्तिलाई राष्ट्रपति बनाउन गइरहेका छौं ?”

उता हिलारी क्लिन्टन खेमामा एफबीआईले चुनावको दिनको केवल एक हप्तामात्रै रहेका बेला इमेल प्रकरणको जाँच सुरू गर्ने घोषणप्रति निक्कै आक्रोष रहेको छ ।

अमेरिकी मिडियामा केही एफबीआईका सुत्रहरुलाई उद्धृत गर्दै  जाँच भइरहेको क्लिन्टनको निजी ईमेल सर्भर विदेशी ह्याकर ले ह्याक गरेको भन्ने जानकारी प्रकासित भएका छन् । तर यसको पुष्टि भएको छैन ।

हिलारी क्लिन्टनको पक्षमा बिभिन्न चुनावी सभाहरूमा अमेरिकी राष्ट्रपति बराक ओबामा र उप राष्ट्रपति जो बाइडेन पनि खटिरहेका छन् ।

तर तिब्र प्रतिस्पर्धा भएको यस चुनावमा दुई उमेदवारहरू मध्ये कसको निर्णायक अग्रता रहेको छ भन्ने बताउन भने निक्कै कठिन रहेको बताइएको छ ।