काठमाडौं । भूकम्पबाट क्षतिग्रस्त ६० मेगावाटको त्रिशुली–३ ए जलविद्युत आयोजनाको पहुँचमार्ग नेपाली सेनाले निर्माण गर्ने भएको छ ।

०७२ वैशाख १२ गतेको भूकम्पले आयोजनास्थल पुग्ने ५ किलोमिटर लामो पहुँचमार्गमा क्षती पुर्याएपछि सरकारले उक्त सडक निर्माणको जिम्मेबारी सेनालाई दिएको हो । भूकम्पले पहुँचमार्ग ध्वस्त बनाएपछि आयोजनाको काम सुचारु हुन सकेको छैन् । आयोजनाको पहुँचमार्ग खोल्नका लागि पहिरो व्यवस्थापन र सडक निर्माणका लागि ६१ करोड रुपैयाँ खर्च हुने अनुमान गरिएको छ । भूकम्पले ठूलो पहिरो गई आयोजनाको विभिन्न संरचनामा भएको क्षतिको लागत विश्लेषण गर्न प्राधिकरणको सञ्चालक समितिले गठन गरेको स्वतन्त्र विज्ञ समूहको अध्ययन प्रतिवेदनका आधारमा सडक निर्माणका लागि थप बजेट मागिएको छ ।  

आयोजना स्थलसम्म पुग्न पहँुच सडक निर्माण र पहिरो व्यवस्थापन गर्न लाग्ने थप लगानी विद्युत् प्राधिकरणले गर्नुपर्ने विज्ञ समूहले बताएको छ । यस्तै त्रिशुली ३ ए आयोजनाको परामर्शदता नर्थवेस्ट हाइड्रो कर्पोरेशनको पनि म्याद थपिएको छ । कुल १२ अर्ब ४२ करोड रुपैयाँमा आयोजनाको सिभिल, परामर्शदाता र प्रसारणलाइन निर्माण सम्पन्न गर्ने लक्ष्य लिएकोमा यसको लागत अझै बढ्ने भएको छ । त्यसबेला आयोजनाको ६५ प्रतिशत काम सम्पन्न भएको थियो । आयोजना डेढ वर्षदेखि बन्द रहेकाले परामर्शदताले मूल्यांकन गरेपछि मात्र थप लागत आउने छ । पहिरोले ध्वस्त बनाएको ५ किलोमिटर सडक संरचना निर्माण गरेर अघि बढनु पर्नेछ । 

निर्धारित समयमा पनि आयोजनाको काम सम्पन्न नभएपछि  ठेकेदार गेजुवाले चार वर्ष म्याद थपको प्रस्ताव गरिसकेको छ । गेजुवाले एक वर्ष मर्मत र तीन वर्ष आयोजाको बाँकी काम सम्पन्न गर्न समय मागेको छ । उसको म्याद थपको विषयमा प्राधिकरणले निर्णय भने गरेको छैन । आयोजनाको ऋण म्याद ५ वर्ष थप गर्न नेपालले चाइना निर्यात–आयात (एक्जिम) बैंकलाई पुनः अनुरोध गरिसकेको छ । यता एक्जिम बैंकले आयोजना सम्पन्न नहुँदै भदौदेखि ऋण परिपक्व भएको भन्दै ऋणको व्याज लाग्ने भन्दै सरकारलाई पत्राचार गरेको छ । एक्जिम बैंकले कर्जा अवधि थप्नका लागि कागजात मागिरहेको आयोजना प्रमुख फडिन्द्र जोशीले जानकारी दिए ।

०७३ असार १५ गतेसम्म अर्थात २०१६ को जुन ३० सम्म सम्पन्न हुने गरी आयोजनाको म्याद दोस्रो पटक थप भएको थियो । हालसम्म ५ अर्ब ३९ करोड रुपैयाँ खर्च भइसकेको आयोजनाले जानकारी दिएको छ । सन् २०११ म ३५ महिनामा काम सम्पन्न गर्ने गरी चाइना गेजुवासँग इन्जिनियरिङ प्रक्युमेन्ट कन्ट्रयाक्ट (ईपीसी) प्रारुपमा निर्माण गर्ने गरी ठेक्का सम्झौता भएको थियो । पछि २६ महिना म्याद थपेर ०७३ असार १५ मा सम्पन्न गर्ने अर्को कार्यतालिका तयार गरिएको थियो ।