अबुधाबी । अष्ट्रेलियाका ब्याट्सम्यान स्टेफन स्मिथ टेस्ट क्रिकेटको ब्याटिङ बरियतामा पहिलो स्थानमा कायमै रहेका छन् । अन्तर्राष्ट्रिय क्रिकेट परिषद् आईसीसीले बुधबार निकालेको टेस्ट क्रिकेटको बरियतामा स्मिथ पहिलो स्थानमा यथावत् रहन सफल भएका हुन् । 

आईसीसीले जारी गरेको बरियतामा स्मिथ ९०६ अंकका साथ टेस्ट ब्याट्सम्यानको सूचीमा पहिलो स्थानमा रहेका हुन् । टेस्ट ब्याट्सम्यानको सूचीमा पाकिस्तानका युनिस खाँन दोस्रो स्थानमा पर्न सफल भएका छन् । उनले ८६० अंक प्राप्त गरेका छन् । बरियतामा इंल्यान्डका जोए रुट तेस्रो स्थानमा छन् । यस्तै दक्षिण अफ्रिकाका हसिम हम्ला चौथो र पाँचांैमा न्युजिल्यान्डका केन विलियमसन रहेका छन् ।

त्यस्तै आईसीसीले सार्वजनिक गरेको बरियताको छैटौंमा भारतका अजिन्का रहाने, सातौंमा अस्ट्रेलियाका आदम भोग्स, आठौंमा दक्षिण अफ्रिकाका एबीडी भिलियर्स, नवौंमा अस्ट्रेलियाका डेभिड वार्नर र दशौंमा पाकिस्तानका मिस्बाह उल हक छन् । 

आईसीसीले सार्वजनिक गरेको टेस्ट क्रिकेटको बलर बरियतामा भारतका रविचन्द्र अश्विनी पहिलो स्थानमा रहेका छन् भने दक्षिण अफ्रिकाका डाले स्टेन दोस्रो स्थानमा छन् । रविचन्द्रले ९ सय अंक प्राप्त गर्दा स्टेनले ८८७ अंक पाएका छन् । बरियताको तेस्रो स्थानमा इंल्यान्डका जेम्स एन्डरसन, चौथोमा श्रीलंकाका रंगेना हेराथ र पाचौँ स्थानमा इंल्यान्डकै स्टुवार्ड ब्रोड छन् ।

यस्तै टेस्ट क्रिकेटको अलराउन्डर बरियतामा भारतका रविचन्द्र अश्विनी ४५१ अंकका साथ पहिलो स्थानमा छन् भने दोस्रो स्थानमा बंगलादेशका सकिब अल हसन, तेस्रोमा इंल्यान्डका मोइन अली, चौथोमा इंल्यान्डकै बेन स्टोक्स र पाचौंमा भारतका रबिद्र जडेजा छन् ।