काठमाडौं । शुक्रबार नेपाल कम्युनिस्ट पार्टीका तेस्रो वरियताका नेताले स्थायी कमिटी सदस्यहरूलाई बोलाएर चिया खुवाए ।

दसैँको सम्मुखमा नेताहरूले चियापान कार्यक्रम आयोजना गर्नु नौलो होइन । क्याडरबेस पार्टीका नेताहरूले चाडपर्वको अवसर पारेर चियापान आयोजना गर्नु अन्यथा कुरा पनि होइन । ने क पा बन्नुअघिको एमालेले त्यसो गर्दै आएको पनि हो ।

तर शुक्रबारको चियापान अर्थपूर्ण र ने क पाभित्रको शक्ति–सङ्घर्षको एउटा हिस्सा थियो । दुवै अध्यक्ष (प्रधानमन्त्रीसमेत रहेका केपी शर्मा ओली र पुष्पकमल दाहाल) मुलुक बाहिर रहेका बेला कार्यवाहक अध्यक्षसमेत नरहेका नेताले चियापान आयोजना गरेको भन्दै कतिपय नेताले ‘माधव नेपालको पावर एक्सरसाइज’को रूपमासमेत अर्थ्याए ।
त्यही चियाभेलालाई लिएर अहिले सामाजिक सञ्जालमा आरोप–प्रत्यारोप शुरू भएको छ ।

प्रधानमन्त्रीका सल्लाहकारसमेत रहेका ने क पाका स्थायी कमिटी सदस्य (हाल प्रधानमन्त्रीसँगै मुलुकबाहिर छन्) विष्णु रिमालले ट्विट लेख्दै नेता नेपालको उक्त कदमलाई पतनको संज्ञा दिए ।

हेर्नुहोस् के लेखेका थिए नेता रिमालले

“मानिसको पतन त्यस समय शुरू हुन्छ, जब
आफ्नैलाई ढाल्न पराईसंग सल्लाह लिन शुरू
गरिन्छ!” pic.twitter.com/5I9Lvwc7je

— Bishnu Rimal (@BishnuRimal) September 28, 2018

‘मानिसको पतन त्यस समय शुरू हुन्छ, जब आफ्नैलाई ढाल्न पराइग सल्लाह लिन शुरू गरिन्छ !’

त्यसो त बिहीबार प्रतिनिधिसभाको वर्षे (बजेट) अधिवेशन अन्त्यका दिन बोल्दै नेता नेपालले ‘सरकारका कारण शिर ठाडो पार्न नसकिएको र जुन जोगी आए पनि कानै चिरेको भन्ने उखान सुनिरहनुपरेको’ भन्दै सरकार र पार्टी नेतृत्वको आलोचना सदनबाटै गरेका थिए ।

त्यसको भोलिपल्ट आयोजना गरेको चियाभेलालाई ओली निकट नेताहरूले चियातुफानको संज्ञा दिए ।

हेर्नुहोस् ईश्वर पोखरेलका सहयोगी र अनेरास्ववियुका सचिवसमेत रहेका आरसी लामिछानेको फेसबुक स्ट्याटस–

तर, प्रधानमन्त्रीका राजनीतिक सल्लाहकार रिमालको चियाभेलाप्रतिको रोषलाई अर्का स्थायी कमिटी सदस्य योगेश भट्टराईले ट्विटमार्फत नै जवाफ दिएका छन्– “सत्ता र शक्तिको चुचुरोबाट हेर्दा अरू पतन भएको देख्दा रहेछन ! कठै दोसी चस्मा !”

शत्ता र शक्तिको चुचुरोबाट हेर्दा अरु पतन भएको देख्दा रहेछन ! कठै दोसी चस्मा !

— Yogesh bhattarai (@yogesbhattarai) September 29, 2018

आरोप–प्रत्यारोको शृंखला यत्तिमै सीमित छैन । अहिले लम्बिएर कार्यकर्ताको फेसबुकका भित्ताभित्तामा पुगेको छ ।

यसलाई पुष्टि गरेका छन्– माधव नेपालका सहयोगी मोहन गौतमले । गौतमले आइतबार लामो स्ट्याटस लेख्दै बिहीबारको सम्वोधन “एउटा जननिर्वाचित प्रतिनिधिका दरूपमा संसदमा सरकारलाई सुझाव” भएको बताएका छन् ।

त्यतिमात्र नभइ नेता नेपालले आन्तरिक बैठकमा पनि सबैभन्दा बढी सुझाव दिने गरेको बताएका छन् । त्यसलाई षडयन्त्र देख्ने र मनमनै अनेकौँ कथा एवम् प्रसङ्ग जोडेर आफुहरु मात्र खास समर्थक भएको देखाउने प्रतिस्पर्धा चलेको भन्दै ‘त्यसलाई दरिद्र चिन्तन’को उपमा दिएका छन् ।

हेर्नुहोस् स्ट्याटस

यसैबीच नेता नेपालको पछिल्लो कदमप्रति पूर्वमाओवादी केन्द्रका नेताहरू भने मौन देखिएका छन् ।

पत्नीको उपचारको लागि सिंगापुर प्रस्थान गर्नुअघि पार्टी अध्यक्षसमेत रहेका पूर्वप्रधानमन्त्री पुष्पकमल दाहालले सम्पादक बोलाएर पार्टी र सरकार सञ्चालनबारे अवगत गराएका थिए । उक्त भेलामा सम्पादकसमक्ष अध्यक्ष प्रचण्डले पार्टी र सरकार सञ्चालनप्रति आफूलाई चित्त नबुझेको तर पनि आफू ‘कुनै जोखिम उठाउने पक्षमा नरहेको’ बताएका थिए ।

ने क पाभित्र सल्किएको भुसको आगो ठम्याउन प्रचण्डको उक्त ‘सन्देश’ निकै काफी हुन्छ ।