काठमाडौं । नेकपा एमाले र माओवादी केन्द्रबीच एकता भएर नेपाल कम्युनिस्ट पार्टी (अन्डरलाइन) गठन भए पनि प्रदेश र जिल्लामा भने दुवै पार्टीको अस्तित्व अझै मेटिइसकेको छैन । जिल्ला र स्थानीय तहहरूमा एकीकरणको प्रक्रिया सुरू भएकै छैन । एमाले र माओवादी केन्द्रले साविककै पार्टीबाट कार्यसम्पादन गर्दै आइरहेका छन् । त्यस्तै दुवै पार्टीका जनसंगठनहरूको पनि अलग–अलग अस्तित्व जीवितै छ । र, दुवैले साविकको संगठनकै ब्यानरमा आफ्ना गतिविधि गरिरहेका छन् ।

जिल्ला समन्वय समितिले आयोजना गर्ने कार्यक्रम, जिल्ला र प्रदेशमा हुने सर्वदलीय, सर्वपक्षीय भेला, बैठकमा मात्र होइन, सार्वजनिक कार्यक्रममा समेत दुवै पार्टीले अलग–अलग प्रतिनिधि पठाउने गरेको पाइएको छ ।

तत्कालीन एमालेका काठमाडौँ जिल्ला कमिटी अध्यक्ष रहेका कृष्ण राईले केन्द्रबाट कुनै कार्यविधि र निर्देशन नआउँदा एमाले र माओवादी केन्द्रले स्वविवेकले कार्य गरिरहेको बताउँछन् ।
“केन्द्रबाट कुनै निर्देशन आएको छैन । अहिलेसम्म दुवै पार्टीले आ–आफ्ना काम गर्दै आएका छन्,” बाह्रखरीसँग कुरा गर्दै उनले भने । नवगठित नेकपाका केन्द्रीय सदस्यसमेत रहेका राईले निर्देशन नआउँदा अन्योल बढेको र स्वविवेक प्रयोग गरेर काम गरिरहेको जानकारी दिए ।

त्यस्तै तत्कालीन माओवादी केन्द्रका ओखलढुंगा इन्चार्ज र पोलिट्व्युरो सदस्य बाबुराम गौतमले जिल्ला र प्रदेशमा दुवै पार्टीको अस्तित्व रहेको बताए । केन्द्रमा एकीकरण भएकाले दुवै पार्टी एक भएर एउटै कार्यालयबाट पार्टीका दैनन्दिनका काम भए पनि तल भने दुवै पार्टीको अस्तित्व रहेको उनले जानकारी दिए । 

“माथि कार्यदल बनेर त्यसले एकीकरणको खाका बनाउँदैछ । सायद कार्यविधि पनि बनाउला । केन्द्रीय कमिटीले अनुमोदन नगरेसम्म तल एकीकरणको प्रक्रिया सुरू हुँदैन र दुवै पार्टीको अस्तित्व रहन्छ,” उनको भनाइ थियो ।

जिल्लामा हुने सर्वपक्षीय भेला तथा बैठकमा दुवै पार्टीले आ–आफ्ना कमिटीको बैठक बसेर प्रतिनिधि पठाउने गरेको र एकीकरणको प्रक्रिया प्रदेश हुँदै गाउँनगरसम्म नहुँदासम्म साविककै कमिटीले काम गर्ने उनको जिकिर थियो ।

कहिले सुरु हुन्छ एकता ?
जेठ ३ गते दुवै पार्टीको एकीकरणपश्चात् जेठ ७ गते नेकपाको पहिलो सचिवालय बैठक बसेको थियो । बैठकले ४४१ सदस्यीय केन्द्रीय कमिटीलाई पूर्णता दिनुका अतिरिक्त दुवै पार्टीका जनवर्गीय संगठन र प्रदेश, जिल्ला, गाउँनगरसम्म एकीकरणको मापदण्ड तयार कार्यदल निर्माण गरेको थियो । महासचिव विष्णु पौडेलको संयोजकत्वमा स्थायी कमिटी सदस्य बेदुराम भुसाल, देव गुरुङ र खिमलाल देवकोटा सदस्य रहेका छन् ।

१५ दिन कार्यअवधि तोकिएको कार्यदलले निर्दिष्ट समयभित्रैमा एकीकरणको खाका तयार पार्ने तयारी गरिरहेको देव गुरुङले जानकारी दिए । “समय–समय बैठक बसेर एकीकरणको प्रारूप तयार पारिरहेका छौँ । सचिवालयले तोकेको समयभित्रमै कार्यसम्पादन गरिसक्छ,” उनले भने ।

दुई पार्टी एक भइसकेकाले मातहतका कमिटीका कार्यसम्पादनमा कुनै असर नपरेको र तल पनि स्वभाविक ढंगले नै कमिटी प्रणालीमा सञ्चालन भइरहेको उनको जिकिर थियो ।

कार्यदलले बुझाएको प्रतिवेदन सचिवालयले अनुमोदन गरेपछि मातहतका कमिटीहरूबीच एकता प्रक्रिया शुरू गरिने गुरूङले जानकारी दिए । जेठ २२ गतेसम्म कार्यदलको म्याद रहेकाले जेठको अन्तिम साताबाटै दुवै पार्टीका जनसंगठन, प्रदेश, जिल्ला र गाउँ नगर कमिटीबीच एकता प्रक्रिया शुरू हुने कमिटीका सदस्य बताउँछन् ।