काठमाडौं । पार्टी एकता र सरकार गठनका लागि प्रदेश र प्रतिनिधिसभाको निर्वाचनमा एउटै घोषणापत्र लिएर जनताको घरदैलोमा पुगेका नेकपा एमाले र  माओवादी केन्द्रबीच केही दिनयता अविश्वासको दूरी बढ्दै गएको छ । 

देशलाई समृद्धि र स्थिर सरकार दिने नारा लगाएर चुनावमा गएका दुई पार्टीबीच सरकार गठनसम्म आइपुग्दा पनि एकता हुन सकेको छैन । बिहीबार प्रधानमन्त्रीको शपथग्रहण गरेका एमाले अध्यक्ष केपी शर्मा ओली नेतृत्वको सरकारमा माओवादी केन्द्र गएको छैन । 

ओली नेतृत्वको सरकारमा माओवादी केन्द्र सहभागी नहुँदा विभिन्न संशय पनि व्यक्त भइरहेको छ । माओवादी केन्द्रका नेताहरुले जनताले चुनावमा सरकार गठनको लागि भन्दा पनि पार्टी एकताको लागि बहुमत दिएको भन्दै आफूहरु सरकारमा सहभागी नभएको बताएका छन् । पछिल्लो समय एमालेले जनताको बहुदलीय जनवादको विषयलाई बहसमै ल्याउन नचाहँदा पार्टी एकतामा ब्रेक लागेको माओवादीका कतिपय नेताहरुको भनाइ छ । 

बुधबार ललितपुरको मानभवनस्थित व्यवसायी शारदाप्रसाद अधिकारीको घरमा भएको एमालेको स्थायी कमिटी बैठक, २ पटक ओली र दाहालबीच भएको वार्ता र पार्टी एकता संयोजन समितिको बैठकमा एमाले खरो रुपमा प्रस्तुत हुँदा पार्टी एकतामा ब्रेक लागेको माओवादी नेताहरु बताउँछन् । 

कार्यदलका एक सदस्यका अनुसार करिब ४ घण्टा बसेको पार्टी एकता संयोजन समितिको बैठकमा एकतापछि एकीकृत पार्टीमा एमाले अध्यक्ष ओली र माओवादी अध्यक्ष दाहालको समान हैसियत हुने, दाहाल कार्यकारी अधिकारसहित अध्यक्ष हुने र ओली प्रधानमन्त्रीसहित सेरेमोनियल अध्यक्ष रहने तथा अध्यक्ष र प्रधानमन्त्री आलोपालो गर्ने विषयमा सहमति जुटेको थियो ।

त्यस्तै, असोज १७ को सहमतिअनुसार पाँच वर्षे कार्यकालमा दुबै आधा आधा समय दाहाल र ओली प्रधानमन्त्री बन्ने, एकतापछि पार्टीको नाम नेपाल कम्युनिष्ट पार्टी राख्ने, पार्टीको राजनीतिक दर्शन माक्सवाद र लेनिनवाद रहने, एकता महाधिवेशनसम्म समाजवाद उन्मुख कार्यदिशा निर्माण र संगठनात्मक संरचनाबारे गृहकार्य गर्न दुई कार्यदल बनाउने पनि सहमति भइसकेको थियो । दुई अध्यक्षबाहेक बहुपद सृजना नगर्ने, एक सयभन्दा कमको केन्द्रीय समिति बनाउने, राष्ट्रपति र उपसभामुख एमालेलाई तथा उपराष्ट्रपति र सभामुख माओवादी केन्द्रलाई दिने विषयमा छलफल भए पनि एमाले नेताहरुले जबज नै राख्नुपर्ने अडान राखेपछि बैठक बिनानिष्कर्ष टुंगियो । 

“पार्टी एकताको लागि बुधबारको बैठकलाई महत्वपूर्ण रुपमा हेरिएको थियो तर, एमालेका साथीहरु त्यसै दिन खरो रुपमा प्रस्तुत हुनुभयो । एमाले नेता एवं पूर्वप्रधानमन्त्री माधवकुमार नेपालको बोली पनि ओली र इश्वर पोखरेलकै भयो  । हामी सिद्धान्तको विषयमा लचिलो भएका थियौं । हामीले पार्टी एकतापछि कि दुबै पार्टीको सिद्धान्त राख्ने कि राख्ने माओवाद र जबज दुबै नराख्ने भन्दा उहाँहरु मान्नु भएन । एमालेका साथीहरुले जवजको विषय उठाउन चाहनुभएन । सिद्धान्तको विषय नै नमिलेपछि पार्टी एकता संयोजन समितिको बैठक रोकियो,” कार्यदलका एक सदस्यले भने ।

माओवादी केन्द्रका नेता मणि थापाले पनि बुधबारको बैठकमा एमालेले सिद्धान्तको विषयलाई मुख्य कारण बनाएको भन्दै पार्टी एकतामा ब्रेक लागेको बताए । “पार्टी एकता संयोजन समितिको बैठकमा एमालेले बहुदलीय जनवादको विषय छलफल गर्न मिल्दैन भनेपछि रोकियो । संसारमा छलफलै गर्न नहुने विषय केही हुँदैन । हरेक विषयमा छलफल हुनसक्छ । पार्टी एकताको लागि पनि सबै विषयमा छलफल हुनुपर्यो नि । उहाँहरुले जवजलाई  बहसमा ल्याउन नचाहेपछि पार्टी एकता गर्न नचाहेको देखिन्छ,” उनले भने ।

बुधबारको घटनाले पार्टी एकताको लागि दुई दलबीच अविश्वास बढ्दै गएको पनि थापाले बताए । “पार्टी एकताको लागि आन्तरिक छलफल गर्नुपर्छ । हाम्रो पार्टीभित्र बुधबारपछि आन्तरिक छलफल भएको छैन । बुधबार जहाँनिरबाट डेडलक भयो, त्यो सुध्रिएको छैन,” थापाले भने, “अस्तिको बैठकले अझै दुई पार्टीबीच विश्वासको वातावरण नभएको देखिन्छ । पार्टी एकताको लागि सबैभन्दा ठूलो एकअर्कोमा विश्वास हुनुपर्छ । लिखित सहमति पनि च्यातेपछि के लाग्छ र ?

माओवादी केन्द्रकी प्रवक्ता पम्फा भूसालले पार्टी एकता र सरकारमा माओवादी केन्द्रको स्थान टुङ्गो लागेपछि  आफूहरु सरकारमा सहभागी हुने बताइन् । उनले भनिन्, “पार्टी एकताको टुङ्गो लागेपछि हामी सरकारमा सहभागी हुन्छौं, छलफल चलिरहेको छ । पार्टी एकताको टुङ्गो नलागेसम्म त हामी सरकारमा कसरी सहभागी हुने ?”