काठमाडौं । आईसीसी विश्व क्रिकेट लिग डिभिजन टु को संघारमा रहेको नेपाली क्रिकेटको भविष्य बिहीबारदेखि कोरिँदैछ । ६ देशको सहभागिता रहेको डिभिजन टु मा नेपाल कस्तो टिम हो र नेपालका अन्य प्रतिस्पर्धी कस्ता छन् ? यसबारे नेपाली राष्ट्रिय टिमका अनुभवी खेलाडी के भन्छन् ?

विनोद भण्डारी नेपाली टिमका नियमित सदस्यजस्तै हुन् तर, यो पटक भने उनी टिम बाहिर छन् । आक्रामक ब्याट्सम्यानको रुपमा परिचित विनोद डिभिजन टु नेपालको भविष्य निर्धारण गर्ने बताउँछन् । हुन पनि, नेपाल डिभिजन टु को शीर्ष २ मा पर्न सके अगाडिको ढोका खोलिने छ तर, नेपाल डिभिजन टु को शीर्ष दुईभित्र पर्न नसके निकै लामो समय ठूला प्रतियोगिताबाट बञ्चित हुनुपर्ने छ । त्यसकारण पनि नेपालको लागि डिभिजन टुले भविष्य निर्धारण गर्नेछ ।

यसपटक भने टिममा पर्नबाट चुकेका विनोदका अनुसार सबै टिम राम्रा छन् । उनी भन्छन्, “कुनै टिमलाई पनि सहज तरिकाले लिन सकिँदैन । हामीले २–३ वटा मिस्टेक गरेपनि जितिहाल्छांै भन्न गाह्रो होला । किनकी सबै टिम राम्रो हो । राम्रो लेभल खेलेको टिम छन् । त्यसले गर्दा नेपाली खेलाडीले आफ्नो प्रदर्शन दिनु नै पर्छ । मलेसियालगायतका अन्य टिमसँग खेलेजस्तो छैन । सबै नेपाली खेलाडीले आफ्नो सय प्रतिशत दिएर खेल्छन् भने प्रतियोगिता जित्छन् ।”

डिभिजन टु को हकदार नेपाल भएको बताएका विनोद यसअघि सन् २०१५ मै करिब ३ वर्षअघि नामिवियामै भएको डिभिजन टु मा नेपालले उत्कृष्ट प्रदर्शन गर्दा नियमित मुख्य खेलाडी थिए । उनको प्रदर्शन पनि औसतमै रहेको थियो । केन्याविरुद्ध विनोदले ७३ रनको योगदान दिएका थिए । 

विनोद भन्छन्, “नेपालको लागि मुख्य हो यो प्रतियोगिता । यसैबाट नेपालको भविष्य कोरिन्छ । मुख्य प्रतियोगितामा म छैन, दुःख त लागिरहेको छ । तर, मैले राम्रो प्रदर्शन गर्न सकिन, त्यसैले टिममा परिन । अब आउने दिनमा राम्रो प्रदर्शन गर्दै टिममा पर्नेछु । चान्स छँदै छ ।”

त्यसो त, नामिविया र नेपालको ग्राउण्ड कन्डिसन एउटै छैन । नेपाली खेलाडीका लागि नामिवियाको पिच निकै कठिन हुन सक्छ । यद्यपि नेपाली खेलाडी नामिवियाको पिचबाट विलकुलै जानकार नभएको भने होइन ।

विनोद भन्छन्, “नामिवियाको पिचको कुरा गर्ने हो भने बलरले राम्रो बलिङ गर्छ भने बलरलाई पनि छ, ब्याट्सम्यानले राम्रो ब्याटिङ गर्छ भने ब्याट्सम्यानलाई पनि छ । नेपालको पिच जस्तो छैन । किनकी नेपालको पिचमा भन्नै सकिँदैन कतिबेला के हुन्छ, तर त्यहाँ त्यस्तो छैन ।” आईसीसी विश्व क्रिकेट लिग डिभिजन टु मा आयोजक नामिवियासँगै, नेपाल, युएई, केन्या, क्यानाडा र ओमन रहेका छन् । 

कस्ता छन् प्रतिद्वन्दी ?

नामिविया
नेपालले डिभिजन टु मा आफ्नो पहिलो खेल आयोजक नामिवियासँग खेल्दैछ । नामिविया घरेलु भूमिको मौका उठाउने लक्ष्यमा छ र यसअघि भएको पराजयको बदला लिने रणनीतिमा छ । तर नेपाल भने आफ्नो पुरानै लयलाई निरन्तरता दिन चाहन्छ ।

यसअघि नेपालले नामिवियालाई करिब ३ वर्षअघि उसको घरेलु भूमिमै डिभिजन टु को खेलमा ३ विकेटले पराजित गरेको थियो । त्यस खेलमा नायक बनेका थिए नेपालका कप्तान पारस खड्का । उनले ६४ रन बनाएका थिए । बिहीबार हुने पहिलो खेलमा पनि नामिविया विरुद्ध राम्रो प्रदर्शन गर्ने रणनीतिमा छन्, कप्तान खड्का ।

विनोद २०१५ मा सम्पन्न भएको डिभिजन टु अन्तर्गत नामिवियासँगको खेल यसरी सम्झिन्छन्, “डिभिजन टु खेल्दा नामिवियामा गर्मी थियो । हामीले त्यहाँ जित्नुको मुख्य कारण बलिङ राम्रो भयो । मिडियम पेसरले राम्रो बलिङ गरे । त्यो प्रतियोगितामा नेपालले सबैभन्दा राम्रो बलिङ गरेको भनेको नै नामिवियाविरुद्ध थियो । त्यसमा सोमपाल र करणले राम्रो बलिङ गरेका थिए ।”“नेपालको टिम र नामिवियाको टिम तुलना गर्दा नेपाल निकै माथि छ । नेपाली ब्याट्सम्यानको अनुभव नामिवियाको भन्दा राम्रो छ । नेपाली खेलाडी नामिवियाको खेलाडीको भन्दा माथिल्लो लेभलको हो,” विनोद थप्छन् ।

हुन पनि नेपालको अब्बल पक्ष भनेकै बलिङ हो । नेपालले त्यस खेलमा नामिवियालाई १४२ रनमै अलआउट गर्न सफल भएको थियो । त्यस खेलमा करण केसीले ३, सोमपाल कामी, वसन्त रेग्मी र शक्ति गौचनले समान २–२ विकेट लिएका थिए ।

यसबाहेक नेपालले नामिवियासँग २०१६ मा काठमाडौंमा आईसीसी विश्व क्रिकेट लिग च्याम्पियनसिपमा २ खेल खेलेको छ, जुन खेलमा नेपाल दुबै खेलमा विजयी भएको रोमाञ्चक इतिहास छ । त्यसैले पनि नेपाली खेलाडीको मनोबल उच्च भएको हुनुपर्छ ।

केन्या
केन्या नेपालको लागि मुख्य चुनौती दिने टिम हो । किनभने अहिलेसम्म केन्यासँग ५० ओभरको खेलमा नेपालले एकमा मात्रै जितेको छ भने ३ खेल केन्यालाई सुम्पेको अलिक तितो इतिहास छ । नामिवियामै ३ वर्षअघि सम्पन्न डिभिजन टु मा यी दुई देशबीच २ पटक भेट भएको छ, जुन दुबै खेलमा नेपाल पराजित भएको छ ।
लिग राउण्डमा नेपाल केन्यासँग ५ विकेटले पराजित भएको थियो भने तेस्रो स्थानको लागि भएको भिडन्तमा पनि १५ रनको झिनो अन्तरले नेपाल पराजित भएको थियो । यद्यपि लिग राउण्डमा नेपालका उपकप्तान ज्ञानेन्द्र मल्लले ९१ रनको उत्कृष्ट पारी खेलेका थिए । त्यस्तै, तेस्रो स्थानको खेलमा नेपालका लागि विनोद भण्डारीले राम्रो प्रदर्शन गर्दै ७३ रन जोड्न सफल भएका थिए ।

यसबाहेक आफ्नै घरेलु मैदान टियू क्रिकेटमा आईसीसी विश्व क्रिकेट लिग च्याम्पियनसिपअन्तर्गतको खेलमा नेपालले केन्यासँग एक खेल हारेको छ भने एक खेलमा जित हात पारेको छ । आईसीसी विश्व क्रिकेट लिग च्याम्पियनसिपमा नेपालले केन्यामाथि १ खेल जितेको छ भने एक खेल हारेको छ ।

युएई
युएई नेपालको लागि निकै तगारो बन्न सक्ने टिम हो । प्रदर्शनको आधारमा हेर्ने हो भने पछिल्लो तीन खेलमा नेपाल युएईसँग लगातार हारेको छ । सन् २०१४ देखि अहिलेसम्म युएईसँग नेपालले तीन खेल खेलेको छ । 

सन् २०१४ मा सम्पन्न आईसीसी क्रिकेट विश्वकप छनोटमा नेपाल युएईसँग १०२ रनले पराजित भएको छ । त्यस्तै, आईसीसी विश्व क्रिकेट लिग च्याम्पियनसिपको अन्तिम तथा सातौं राउण्डमा पनि नेपाल दुबै खेलमा युएईसँग हारेको छ ।

क्यानडा
क्यानडा आईसीसी विश्व क्रिकेट लिग डिभिजन थ्री बाट टु मा बढुवा भएको टिम हो । तीन वर्षअघि डिभिजन टु बाट घटुवा हुँदै क्यानडा डिभिजन थ्री मा परेको टिम हो । २०१४ देखि अहिलेसम्म क्यानडासँग नेपालले २ खेल खेलको छ । २०१४ को विश्वकप छनोटमा नेपाल क्यानडासँग १२ रनले पराजित भएको थियो ।

त्यसको १ वर्षपछि भएको डिभिजन टु मा नेपालले बदला लिँदै क्यानडामाथि ७ विकेटको शानदार जित हात पारेको थियो । फेब्रुअरी १४ मा हुने लिग चरणको अन्तिम खेलमा नेपाल शतप्रतिशत नतिजा निकाल्ने दाउमा छ ।

ओमन
ओमन आईसीसी विश्व क्रिकेट लिग डिभिजन थ्री बाट बढुवा हँुदै टिभिजन टु मा पुगेको हो । नेपालले यसअघि ५० ओभरको खेलमा ओमनसँग १ पटक मात्रै खेलेको छ । २०१३ सालमा बर्मुडामा सम्पन्न आईसीसी विश्व क्रिकेट लिग डिभिजन थ्री उपाधि नेपालले जित्दा लिग चरणको खेलमा ओमनलाई २८ रनले पराजित गरेको छ ।
पछिल्लो समयमा ओमनले क्रिकेटमा राम्रो छलाङ मारेको छ तर डिभिजन टु मा सबैभन्दा कमजोर प्रतिद्वन्दीको रुपमा नेपालले ओमनलाई लिएको छ ।

विनोद भण्डारीको विश्लेषणअनुसार कप्तान पारस, ज्ञानेन्द्र र शरदलाई राम्रा अन्य खेलाडीले साथ दिएमा नेपाल डिभिजन टु को च्याम्पियन बन्ने निश्चितजस्तै छ । तर त्यसको लागि नेपाली टिमलाई कठिन चुनौती पार गर्नु पर्नेछ । विनोद भन्छन्, “सबै खेलाडीले राम्रो गर्न चाहँदा चाहँदै राम्रो नतिजा ननिक्लिएको मात्रै हो । पारस, ज्ञानेन्द्र र शरद दाइलाई अन्य खेलाडीले राम्रो साथ दिने हो भने नेपाल एकदमै माथि पुग्छ । नेपालले जितेको म्याचमा हेर्ने हो भने पारस दाइको राम्रो प्रदर्शन हुने गरेको छ ।”

विनोद नयाँ खेलाडीमाथि पनि निकै आशावादी छन् । थप्छन्, “नयाँ खेलाडीको लागि यो ठूलो मौका हो । नयाँ खेलाडीहरू राम्रा छन् । मलाई अलिक भरोसा बढेको भनेको रोहित कुमार पौडेलबाट हो । रोहितले म्याच निकाल्न सक्छ जस्तो लाग्छ ।”