काठमाडौं  । नेपालको पहिलो अनुसन्धानमुलक विश्वबिद्यालयको रुपमा चित्लाङ्मा स्थापित मदन भण्डारी विज्ञान तथा प्रविधि विश्वबिद्यालयले इन्स्टिच्युट अफ अप्लाइड साइन्स अन्तर्गत विभिन्न विधामा ८ सिटमा बिद्यावारिधि तथा ४८ सिटमा स्नातकोत्तरमा भर्नाको निमित्त आवेदन माग गरेको छ । विश्वविद्यालयले आर्टीफिसिएल इन्टेलिजेन्स, अर्ग्यानिक कृषि, फरेस्ट बायोमटेरिएल साइन्स तथा इञ्जिनियरिङ्ग, तथा सस्टेनेबल र रिसिलियन्ट संरचना गरि चारवटा विधामा आवेदन माग गरेको हो । स्नातकोत्तर तह अध्ययनका लागि विश्वविद्यालयले २५ देखि शतप्रतिशत छात्रवृत्ति तथा प्रत्येक विधामा दुई जनालाई शैक्षिक भत्ता समेत प्रदान गर्ने छ । 

प्रत्येक विधामा बिद्यावारिधि गर्ने २ जना विद्यार्थीका लागि शतप्रतिशत छात्रवृत्ति तथा महिनाको २० हजार (तीन वर्षको लागि) र स्नातकोत्तर गर्ने २ जना विद्यार्थीहरुका लागि महिनाको १२ हजार रकम (२ बर्षको लागि) उपलब्ध गराउने छ । 

प्रत्येक विधामा बिद्यावारिधिमा २-२ वटा तथा स्नातकोत्तरमा १६-१६ वटा सिटहरु उपलब्ध छन् । कुनै एक विषय आफ्नै खर्चमा अध्धयन गर्न बर्षको एक लाख पचास हजार शुल्क तिर्नु पर्दछ ।

विश्वबिद्यालयमा एप्लाइड साइन्स मास्टर र बिद्यावारिधि कार्यक्रमहरू विज्ञान, प्रविधि, इन्जिनियरिङ र गणित केन्द्रित छन्। प्राङ्गारिक कृषि र वनजैविक श्रोत कार्यक्रमले कृषि, वनपैदावारहरूको मूल्यवर्धित (भ्यालुयाडेड) उपयोगका लागि दिगो प्रविधिहरू विकास गर्ने उद्देश्य राखेको छ। कृषि तथा वनपैदावारहरूको दिगो व्यवस्थापनका लागि अत्याधुनिक अनुसन्धान र प्रविधिहरू लागू गरी पर्यावरणीय, आर्थिक, र सामाजिक क्षेत्रमा फाइदा पुर्याउने लक्ष लिएको छ । विशेष गरी, यसले स्थानीय र अन्तर्राष्ट्रिय स्तरमा कृषि तथा वन-आधारित उद्योग तथा व्यवसायिक क्षेत्रको भविष्यको आवश्यकताहरू पूरा गर्न मद्दत गर्नेछ ।

त्यसै गरि सस्टेनेबल र रिसिलियन्ट संरचना कार्यक्रमले आफ्नो अनुसन्धान मार्फत स्थानीय आर्थिक विकासका लागि ग्रामीण पर्यटनलाई बढावा दिन होमस्टे, टि हाउस, गोरेटो र ट्रेकिंग मार्गहरू, र सम्बन्धित सेवाहरू समावेश गरी टिकाऊ र सक्षम पूर्वाधार विकास गर्ने योजना राखेको छ । नया विधा एआई बिद्यावारिधिले विद्यार्थीहरु प्रविधि, स्वास्थ्य, कृषि, वातावरण, सुशासन, संकट व्यवस्थापन आदि जटिल चुनौतीहरूमा उन्नत एआई विधिहरू लागू गर्ने सक्षम बैज्ञानिकहरू बन्ने गरी कोर्स डिजाइन गरिएको छ। यी कार्यक्रमहरु संयुक्त राष्ट्र संघको दिगो विकास लक्ष्यहरूमा आधारित छन र सामाजिक रूपमा जिम्मेवार, नैतिक, र प्रासंगिक अनुसन्धानलाई प्रोत्साहन गर्दछन् ।