काठमाडौं । काठमाडौं महानगरपालिकाका प्रमुख प्रशासकीय अधिकृत सरोज गुरागाईंले मंगलबार नगरप्रहरी बलका प्रमुख राजुनाथ पाण्डेलाई स्पष्टीकरण सोधे । मेयर बालेन शाहको मौखिक निर्देशनमा ०८१ चैत २१ गते गुरागाईंलाई कार्यालय प्रवेशमा रोक लगाउन खोजेको घटनालाई लिएर पाण्डेलाई सातबुँदे स्पष्टीकरण सोधिएको हो । 

महानगरका कर्मचारी तथा पेसागत संगठनले पाण्डेमाथि तत्काल निलम्बन गरेर छानबिन गर्नुपर्नेसहित ११ बुँदे माग राखेर गुरागाईंलाई ज्ञापनपत्र बुझाएका थिए । पाण्डेका गतिविधिलाई लिएर कर्मचारी र जनप्रतिनिधि एकजुट भएपछि गुरागाईंले उनलाई स्पष्टीकरण सोधेका हुन् ।

उनले प्रमुख प्रशासकीय अधिकृतका हैसियतले आफू कार्यालय आउँदा नगरप्रहरी बलको अनधिकृत परिचालन गरेर पाण्डेले अभद्र र गैरकानुनी हर्कत देखाएको बताएका छन् ।

चैत २१ गते नै महानगरकी उपमेयर सुनिता डंगोलले नगरप्रहरी प्रमुख पाण्डेलाई ताला लगाएको विषयमा प्रश्न गरेकी थिइन् । जवाफमा पाण्डेले मेयरको मौखिक आदेश आएको बताएका थिए ।

पाण्डेलाई स्पष्टीकरणका लागि सात दिनको समय दिइएको छ । सात दिनभित्र स्पष्टीकरण नबुझाए वा स्पष्टीकरणमा चित्त नबुझे कानुनबमोजिम कारबाही हुने पत्रमा उल्लेख छ ।

गुरागाईंले चाहे हट्न सक्छन पाण्डे
काठमाडौं महानगरपालिकाको महानगर प्रहरी सेवालाई व्यवस्थापन गर्न बनेको महानगर प्रहरी ऐन, २०८० मा महानगर प्रहरी गठन, रेखदेख तथा नियन्त्रणसम्बन्धी व्यवस्था छ । 

“महानगर प्रहरीको परिचालन रेखदेख, नियन्त्रण र निर्देशन दिने अधिकार प्रमुख प्रशासकीय अधिकृतलाई हुनेछ र निजको आदेश र निर्देशन पालना गर्नु प्रत्येक महानगर प्रहरीको कर्तव्य हुनेछ,” ऐनमा भनिएको छ । 

गुरागाईंले सात दिनपछि के हुन्छ भन्ने बाह्रखरीको प्रश्नमा कानुनबमोजिम कारबाही गर्ने बताए । “स्पष्टीकरण सबै चैत २१ गतेको घटनाबारे हो । सातदिनपछि कानुनले जे भन्छ त्यही गर्छु,” उनले भने । 

महानगरमा ६ महिनायता मेयर, उपमेयर, प्रमुख प्रशासकीय अधिकृत, वडाध्यक्ष, कार्यपालिका सदस्य र कर्मचारीबीचको विवाद कायमै छ ।

स्पष्टीकरणको विषयमा पाण्डे भने मौन छन् । उनले आफू अहिले केही नबोल्ने बताएका छन् । “यस विषयमा म अहिले केही पनि बोल्दिनँ । स्पष्टीकरण दिनुअघि मात्रै बोल्छु,” पाण्डेले बाह्रखरीसित भने ।

पाण्डेलाई सोधिएको सातबुँदे स्पष्टीकरण पत्रमा के छ ?