काठमाडौं । नेकपा माओवादी केन्द्रले प्रतिनिधिसभा र प्रदेशसभा निर्वाचनमा कम्तिमा पनि १६ जिल्लामा अन्तर्घात भएको निष्कर्ष निकाल्दै छानविन समिति बनाएको छ ।
माओवादीले अन्तर्घात एमालेबाट मात्रै नभइ आफ्नै पार्टीका नेताबाट पनि भएको निष्कर्ष निकालेको छ ।

प्रतिनिधिसभा र प्रदेशसभा निर्वाचनमा एमाले र माओवादी केन्द्रबीच तालमेल भएको थियो । एमालेका ६० र माओवादी केन्द्रका ४० प्रतिशत उमेदवार थिए ।

नेकपा माओवादी केन्द्रका अध्यक्ष पुष्पकमल दाहाल प्रचण्डको निवास खुमलटारमा बसेको बैठकले कम्तिमा १६ जिल्लामा अन्तर्घात भएको भन्दै नेता अमिक शेरचनको नेतृत्वमा छानविन समिति बनाएको छ ।

छानविन समितिमा  लिलामणि पोखरेल, गणेश शाह, हितराज पाण्डे र रेखा शर्मा रहेका छन् ।  उमेदवारले नै अन्तर्घात भयो भन्ने उजुरी गरेपछि छानविनका लागि समिति बनाइएको हो ।

गोरखा, पर्सा, सिरहा, धनुषा, कैलाली, कञ्चनपुर, दैलेख, खोटाङ, पाँचथर, सल्यान, हुम्लालगायत १६ भन्दा बढी जिल्लाका उमेदवारहरुले आफ्नै स्थानीय नेता कार्यकर्ताले अन्तर्घात गर्दा पराजित हुनुपरेको बताएका छन् ।

अन्तर्घात गर्नेलाई प्रकृतिअनुसारको कारवाही गर्ने निर्णय गरेको माओवादी केन्द्रका नेता मणि थापाले जानकारी दिए । उनले चुनावमा माओवादी उमेदवार एमालेका कारण मात्रै नभइ आफ्नै कारण पनि पराजय भएको बताए । उनले भने, “एमालेका मतदाताले माओवादीलाई मतदान गरेका छन्, माओवादीकै मतदाताले आफ्नै उमेदवारलाई मतदान नगरेको देखियो । त्यसैले एमालेका मतदाताको कारणले माओवादी उमेदवार पराजित भएका होइनन्, आफ्नैले गर्दा पराजित हुुनुपर्यो ।”

तर अर्का नेता देवेन्द्र पौडेलले एमाले र माओवादीका दुवै पार्टीका नेताले अन्तर्घात गरेको बताए ।

पार्टीभित्रबाट मात्र नभइ एमालेले पनि अन्तर्घात गरेको उजुरी आएको माओवादी केन्द्रका नेता देवेन्द्र पौडेलले बताए । उनले बाह्रखरीसँग भने, “केही जिल्लाका उजुरीहरु पार्टीभित्रबाट मात्र अन्तर्घात भयो भन्ने छन भने केहीमा एमालेले पनि अन्तर्घात गर्यो भन्ने छन् । त्यस्ता उजुरीहरुमा एमालेका मतदाताले माओवादीलाई मतदान नगरेको भन्ने देखिन्छ । जसको कारणले माओवादी केन्द्रका उमेदवारहरुले पराजय बेहोर्नुपर्यो ।’’

नेता पौडेलले एमाले र माओवादी एकअर्काका अन्तर्घातको कारण पराजय भएका उमेदवारको विषयमा दुवै पार्टीभित्र छलफल हुने पनि बताए ।