जिउचुवान । चीनको मानवयुक्त अन्तरिक्ष कार्यक्रम अन्तर्गत ‘शेन्जोउ–२०’ अन्तरिक्ष यान यही बिहीबार अप्रिल २४ तारिखका दिन दिउँसो ५ः१७ बजे उत्तरपश्चिम चीनस्थित जिउचुवान स्याटेलाइट प्रक्षेपण केन्द्रबाट प्रक्षेपण गरिने जानकारी चीन मानवयुक्त अन्तरिक्ष एजेन्सी (सीएसएमए)ले दिएको छ ।

‘शेन्जोउ–२०’ चीनको मानवयुक्त अन्तरिक्षयान श्रृंखला ‘शेन्जोउ’ को एउटा सम्भावित भविष्यको मिसन हो, जुन चीनको तियाङ्गोङ अन्तरिक्ष स्टेसनसँग सम्बन्धित हुनेछ । यो चीनको मानव अन्तरिक्ष कार्यक्रमअन्तर्गत सञ्चालन हुने मिसनहरूमा पर्दछ, जसलाई चीनको अन्तरिक्ष एजेन्सी (सीएसएमए)ले व्यवस्थापन गर्छ । शेन्जोउ मिसन अन्तरिक्ष यात्री र वैज्ञानिक उपकरणहरूलाई अन्तरिक्ष स्टेशनमा पठाउने तथा फर्काउने कार्यमा प्रयोग गरिन्छ । शेन्जोउ–२० ले पनि चालक दलको अनुसन्धानका लागि महत्त्वपूर्ण भूमिका खेल्ने अपेक्षा गरिएको छ ।

यस अन्तरिक्ष यानमा तीनजना अन्तरिक्ष यात्री डोङ (कमाण्डर), चेन् झोङरुई र वाङ जिए सहभागी हुनेछन् । उक्त जानकारी सीएसएमएका प्रवक्ता लिन सीछ्याङले पत्रकार सम्मेलनमार्फत दिएका छन् ।

प्रवक्ता लिनका अनुसार, प्रक्षेपण हुने दिन चीनको दशौं ‘अन्तरिक्ष दिवस’ पनि परेको छ । चीनले सन् २०१६ देखि अप्रिल २४ तारिखलाई आफ्नो पहिलो उपग्रह ‘दोंगफाङहोङ–१’ को सफल प्रक्षेपणको सम्झनामा अन्तरिक्ष दिवसको रूपमा मनाउँदै आएको छ ।

शेन्जोउ–२० को प्रक्षेपणका लागि लङ मार्च–२एफ नामक रकेट प्रयोग गरिनेछ, जसमा चाँडै इन्धन भरिने प्रक्रिया अगाडि बढ्नेछ । हाल सबै तयारी कार्यहरू सुचारु र व्यवस्थित रूपमा अघि बढिरहेको सीएसएमएले जनाएको छ ।

शेन्जोउ–२० मिसन चीनको मानवयुक्त अन्तरिक्ष कार्यक्रमको ३५औँ उडान हो भने अन्तरिक्ष स्टेसनको प्रयोग र विकास चरणको पाँचौँ मानवयुक्त मिसन हो ।

प्रक्षेपणपश्चात् करिब ६.५ घण्टाभित्र अन्तरिक्ष यानले स्वचालित रूपमा ’तियान्हे’ नामक कोर मोड्युलको रेडियल पोर्टमा डक गर्नेछ । यसरी तीन मोड्युल र तीन अन्तरिक्ष यान मिलेर एउटा संयोजन तयार हुनेछ ।

प्रवक्ता  लिनका अनुसार, अन्तरिक्ष यात्रीहरूको स्वास्थ्य अवस्था सन्तोषजनक रहेको छ । उनले थप जानकारी दिँदै  ‘शेन्जोउ–२०’ का चालक दल आगामी अक्टोबर महिनाको अन्त्यतिर उत्तर चीनको डोङफेङ अवतरण स्थलमा सुरक्षित रूपमा फर्कने तालिका तय गरिएको बताएका छन् । रासस/सिन्ह्वा