काठमाडौं । हुम्लाको अदानचुली गाउँपालिकामा वर्षाका कारण घर, पसलमा क्षति पुगेको छ । ठूलो संख्यामा पशुचौपाया मरेको पालिकाका अध्यक्ष मोहनविक्रम सिंहले जानकारी दिए ।

बिहीबार (वैशाख ४) बिहानको अविरल वर्षाका कारण अदानचुली–२ र ३ नम्बर वडाका विभिन्न स्थानमा क्षति पुगेको उनले बताए । “बिहान ६ बजेतिर आएको अविरल वर्षाको कारणले अदानचुली पालिकाको २ र ३ एरियामा पर्ने अदानचुली पालिकाको बजार क्षेत्र पूरै घरघरमा पानी पसेर, पालिकाको कार्यालयमा पनि पानी पसेर ध्वस्त (क्षति) भएको छ,” उनले बाह्रखरीसित भने ।

विभिन्न सडकमा पनि क्षति पुगेको उनले बताए । मानवीय क्षति नभएको उनले जानकारी दिए । “बाटोहरू पूरै ध्वस्त (क्षति), भवनहरू ध्वस्त, त्यस्तै तलतिरको एरियामा मानवीय क्षति भएको छैन, तर भौतिक क्षति र पशुचौपायाको थुप्रै क्षति भएको छ,” उनले भने । केही ‘सामान्य’ खुद्रा पसल बाढीले बगाएको उनको भनाइ छ ।

घटनास्थलमा जनप्रतिनिधि, कर्मचारी, सुरक्षाकर्मी खटाएर उद्धार र राहतका निम्ति पहल गरिएको उनले बताए । क्षतिको यकिन विवरण संकलनको कार्य पनि जारी रहेको उनले जानकारी दिए ।

अदानचुली–२ र ३ को बीचमा पर्ने बजार क्षेत्रका घर, कार्यालयमा पानी पसेको उनले बताए । खोलामा बाढी आएर नभई आकाशेपानीका कारण घर, पसल र पशुचौपाया क्षति भएको उनले जानकारी दिए । “खोलामा बाढी आएर होइन, माथि आकाशेपानीले हो,” उनले भने, “पानी जम्मा भएर बाढी भयो, बाढीले (गोठ) भत्कायो । पहिरो छैन ।”

विभिन्न स्थानका सडकमा भने पहिरो खस्दा बाटो अवरुद्ध भएको उनले बताए । “पहिरा त, विभिन्न बाटोघाटोमा पहिरो आएर रोडै ब्लक (अवरुद्ध) भएका छन्,” उनले भने ।

अदानचुली–३, छहराखेतस्थित एउटा गोठ भत्कँदा बाख्रा मरेको उनले जानकारी दिए । अध्यक्ष सिंहले भने, “बाख्रा मरेको बाढी आएर गोठ भत्काएर, गोठभित्र बाख्राहरू राखेको, त्यही बाख्रागोठ नै भत्किएर बाख्राहरू मरेका हुन् ।

भत्किएको उक्त गोठ स्थानीय धर्म बुढाको भएको सिंहका सचिवालय सदस्य जीवन बुढाले जानकारी दिए । त्यति बेला त्यहाँ ८१ बाख्रा रहेको आफूले जानकारी पाएको उनले बताए ।

“गोठमा ८१ वटा बाख्रा रहेछ, ५२ वटा मरेको छ,” उनले भने, “२९ वटालाई जीवितै निकालिएको छ । लेदोपानी पसेर गोठ भत्किएको रहेछ ।”

वर्षाका कारण अदानचुली–२ मा एउटा घर भत्किएको छ । गाउँपालिका कार्यालयका विभिन्न कोठामा समेत पानी पसेको छ । गाउँपालिकाका कृषि र पशु शाखामा लेदोपानी पस्दा कागजात क्षति भएको उनले बताए ।

जिल्ला प्रहरी कार्यालय हुम्लाका प्रमुख एवं एसपी शंकर पोखरेलले वर्षाका कारण गोठ भत्कँदा केही बाख्रा मरेको सूचना प्राप्त भएको बताए । उक्त स्थान सदरमुकाम सिमकोटबाट करिब ११ घण्टाको पैदल दूरीमा पर्ने उनले जानकारी दिए ।

बिहीबार देशका विभिन्न स्थानमा हल्कादेखि मध्यम वर्षा भएको जल तथा मौसम विज्ञान विभागले जनाएको छ ।