काठमाडौं । चर्चित बेलायती स्ट्यान्डअप कमेडियन, अभिनेता र पोडकास्टर रसेल ब्रान्डविरुद्ध बलात्कार र यौन उत्पीडनको मुद्दा दर्ता गरिएको छ।

बीबीसीका नुर नान्जीको रिपोर्टका अनुसार लन्डनको महानगरीय प्रहरीले एक विज्ञप्तिमा रसेलमाथि लागेको आरोपबारे जानकारी दिएको छ ।

प्रहरीले रसेल ब्रान्डलाई पत्र लेखेर उनीविरुद्ध जबरजस्ती करणी, कुटपिट, मुख बलात्कार, यौन दुर्व्यवहार र अन्य दुईवटा मुद्दा दर्ता भएको जानकारी दिएको छ ।

ब्रान्डलाई मे २ मा वेस्टमिन्स्टर मजिस्ट्रेटको अदालतमा उपस्थित हुन भनिएको छ । रसेल ब्रान्डविरुद्धको आरोप चार फरक महिलासँग सम्बन्धित छ।

सेप्टेम्बर २०२३ मा, द सन्डे टाइम्स, द टाइम्स र च्यानल ४ को वृत्तचित्र शृंखला ‘डिस्प्याचेस’मा रसेल ब्रान्डविरुद्ध निकै गम्भीर आरोपहरूको खुलासा गरिएको थियो। यस विषयमा प्रहरीले रसेल ब्रान्डलाई पटक–पटक सोधपुछ गरेको थियो ।

तर ४९ वर्षीय रसेल ब्रान्डले आफूमाथि लागेको आरोप अस्वीकार गरेका छन् । बीबीसी