बेरुत । लेबनानको सिडोनस्थित एउटा अपार्टमेन्टमा शुक्रबार (अप्रिल ४) गरिएको इजरायली ड्रोन आक्रमणमा हमासका वरिष्ठ अधिकारी हसन फरहत र उनका दुई छोराको मृत्यु भएको लेबनानी सेना र अल जदीद टीभी च्यानलले जनाएको छ ।

इजरायली ड्रोनबाट मध्य सिडोनको अल–जहरास्थित हमास नेता हसन फरहत बस्दै आएको अपार्टमेन्टमा क्षेप्यास्त्र प्रहार गरिएको लेबनानको सुरक्षा स्रोतले जनाएको छ । क्षेप्यास्त्र प्रहारबाट अपार्टमेन्टमा आगलागी हुँदा फरहत र उनका दुई छोराको मृत्यु भएको स्रोतले जनाएको छ ।

अपार्टमेन्टमा फैलिएको आगो अग्निनियन्त्रक र नागरिक सुरक्षाका कर्मचारीले निभाएका र लेबनानी रेडक्रसका एम्बुलेन्सले शव अस्पताल पुर्‍याएको रिपोर्ट गरिएको छ । रासस/सिन्ह्वा