काठमाडौं । युरोपेली युनियन (ईयू)ले एलन मस्कको सामाजिक सञ्जाल कम्पनी एक्स (ट्विटर)लाई ठूलो जरिवाना लगाउन लागेको छ । एक्सले डिजिटल सेवा ऐन उल्लंघन गरेको, भ्रामक सूचना र घृणा फैलाएको (ईयू)ले आरोप लगाएको छ । 

युरोपेली युनियनका नियामकहरूले एलन मस्कको सामाजिक सञ्जाल माध्यम एक्समा गैरकानुनी सामग्री र भ्रम फैलाउने विषयमा ऐतिहासिक कानुन उल्लंघन गरेको भन्दै १ अर्ब अमेरिकी डलरभन्दा बढी जरिवाना लगाउन लागेको द न्युयोर्क टाइम्सले उल्लेख गरेको छ । 

यो कारबाहीअन्तर्गत डिजिटल सेवा ऐनअनुरूप जरिवाना र प्रोडक्ट परिवर्तन गर्ने माग समेत हुने समाचारमा बताइएको छ ।

“हामीले सधैँ निष्पक्ष रूपमा कानुन लागु गर्दै आएका छौँ र ईयूमा सञ्चालन हुने सबै कम्पनीहरूप्रति भेदभाव नगरी यो नीति कार्यान्वयन जारी राख्नेछौँ,” युरोपेली आयोगका प्रवक्ताले बताए ।

ईयू अधिकारीहरूले एक्ससम्बन्धी भइरहेको अनुसन्धान ट्रम्प प्रशासनले लगाएको व्यापारिक प्रतिबन्ध र आयात कर लगाउने योजनालगायतका अमेरिका ईयूबीचको विवादबाट प्रभावित नभएको पनि बताए ।

समाचार अनुसार ईयूभर घृणा फैलाउने भाषण र भ्रम फैलाउने सामग्रीलाई नियन्त्रण गर्न नसक्ने आरोपमा एक्सविरुद्ध थप जाँच पनि भइरहेको छ ।

यो खबर प्रकाशित भएपछि सामाजिक सञ्जाल कम्पनी एक्सले यसलाई यसअघि कहिल्यै नभएको राजनीतिक सेन्सरसिप भन्दै वाक् स्वतन्त्रतामा आक्रमण गरिएको आरोप लगाएको छ । एलन मस्कले यस्तो जरिवानाविरुद्ध अदालतमै चुनौती दिने घोषणा गरेका छन् ।

ईयूले उसको डिजिटल मार्केट्स ऐन उल्लंघन गरेको भन्दै अमेरिकाको मेटा र एप्पल कम्पनीविरुद्ध पनि कारबाही गर्ने तयारी गरेको बताइएको छ ।