बेइजिङ । चीनले शुक्रबार अमेरिकी आयातमा ३४ प्रतिशत कर लगाउने घोषणा गरेको छ । अमेरिकी राष्ट्रपति डोनाल्ड ट्रम्पको बढ्दो विश्वव्यापी व्यापार युद्धमा नयाँ करविरुद्ध जवाफी कारबाही गर्ने चीन पहिलो प्रमुख अर्थतन्त्र बनेको छ । 

संयुक्त राज्य अमेरिकाको शीर्ष व्यापारिक साझेदारमध्ये एक चीन सबै अमेरिकी आयातमा ३४ प्रतिशत भन्सार शुल्क अप्रिल १० देखि लागु हुने घोषणा गर्ने पहिलो मुलुक हो । चीनले भन्सार शुल्कमाथि विश्व व्यापार संगठन (डब्लूटीओ)मा मुद्दा दायर गर्ने बताएको छ ।

चीनले चिकित्सा प्रविधि र उपभोक्ता इलेक्ट्रोनिक्समा प्रयोग हुने केही दुर्लभ खनिज तत्त्वहरूमा निर्यात नियन्त्रण लगाउने पनि बताएको छ । 

विभिन्न देशले अमेरिकी भन्सार शुल्कको आलोचना गरेका छन् । तर चीनबाहेक उनीहरूले संयुक्त राज्य अमेरिकासँग वार्ताको प्रस्ताव गर्दै अहिलेसम्म प्रतिशोधात्मक उपायहरू रोकेका छन् ।

विश्वव्यापी व्यापार व्यवस्थापन गर्न मद्दत गर्ने विश्व व्यापार संगठन (डब्लूटीओ)का प्रमुख एनगोजी ओकोन्जो–इविलाले उथलपुथलले ‘यस वर्ष विश्वव्यापी व्यापारको मात्रामा एक प्रतिशत’ को संकुचन निम्त्याउन सक्ने चेतावनी दिएका छन् । रासस/एएफपी