काठमाडौं । प्यालिस्टनको गाजा सहरको उत्तरी क्षेत्रमा विस्थापित परिवारहरूको आश्रयस्थल एक विद्यालयमा इजरायलले गरेको हवाई हमलामा कम्तिमा २७ प्यालिस्टनी सर्वसाधरणको मृत्यु भएको छ । 

गाजा सहरको उत्तर–पूर्वी टुफ्फाह जिल्लामा अवस्थित दार अल–अर्कम विद्यालयमा गरिएको हमलामा अन्य धेरै घाइते भएको हमास–नियन्त्रित स्वास्थ्य मन्त्रालयलाई उदृत गर्दै बीबीसीले जनाएको छ ।

इजरायली सेनाले भने गाजा सहरमा हमासको कमान्ड र नियन्त्रण केन्द्रमा रहेका प्रमुख विद्रोहीमाथि आक्रमण गरेको बताएको छ । तर, विद्यालयलमा आक्रमण भएको विषयमा इजरायलले केही उल्लेख गरेको छैन ।

यसअघि, हमासको स्वास्थ्य मन्त्रालयले २४ घण्टाको अवधिमा इजरायली हमलामा परी अरु ९७ जनाको मृत्यु भएको बताएको थियो । 
यसैबीच, इजरायलले प्यालिस्टनी क्षेत्रको ठूलो भाग कब्जा गर्न आफ्नो आक्रमण विस्तार गरिरहेको बताएको छ । बीबीसी