काठमाडौं । उत्पादनमूलक क्षेत्रमा लगानी केन्द्रित गर्दै आएको व्यावसायिक घराना एमएस ग्रुपले पछिल्लोसमय हस्पिटालिटी (होटेल) क्षेत्रमा आक्रामक भएर लगानी बढाइरहेको छ । राजधानीको नक्सालमा पाँचतारे मेरियट होटेल र ठमेलमा तीनतारे मेरियट फेयरफिल्ड होटेल सञ्चालन गरिरहेको ग्रुपले नयाँ अवधारणामा कमलादीमा चारतारे होटेल मोक्सी बनाइरहेको छ । 

आतिथ्य उद्योगमा आक्रामक रूपमा लागेको व्यापारिक घराना एमएसको मोक्सी तेस्रो होटेल परियोजना हो । होटेलको पूर्वाधार निर्माणको काम अन्तिम चरणमा पुगेको छ । आउँदो असारभित्र होटेल सञ्चालनमा ल्याउने तयारी भएको ग्रुपका अध्यक्ष शशिकान्त अग्रवालले बाह्रखरीलाई जानकारी दिए ।

एकसय कोठा रहेको होटेल बनाउन झन्डै दुई अर्ब रुपैयाँ   लगानी भएको उनले जानकारी दिए । पहिला एक अर्ब ५० करोड रुपैयाँ लाग्ने अनुमान गरिएकोमा पछि बढेर झन्डै दुई अर्ब रुपैयाँ पुगेको छ । म्यारियटअन्तर्गतकै मोक्सी ब्रान्डमा होटेल सञ्चालन हुने अध्यक्ष अग्रवालले जानकारी दिए ।

होटेल पूर्वाधार दुई रोपनी क्षेत्रफलमा बनेको छ । मोक्सी होटेलमा युवापुस्तालाई लक्षित गरिएको छ । मोक्सी ब्रान्ड नै फरक अवधारणाबाट सञ्चालन गरिरहेकाले होटेल युवालक्षित हुने उनको भनाइ छ । होटेल कमलादीको प्रज्ञा भवनको ठ्याक्कै पछाडि निर्माणाधीन अवस्थामा छ ।

होटेल गीत संगीतको मज्जा लिन र दिनभरी रमाइलो गर्न बनाउन लागेको हो । युवापुस्तालाई बढी लक्षित गरेर कमलादीमा नयाँ होटेल बनाइएको अग्रवालले जानकारी दिए ।

विश्वमा रहेका मोक्सी होटेल युवापुस्तामाझ लोकप्रिय बनेको छ । युवापुस्तालाई लक्षित गरी मोक्सी होटेल ल्याइएको भनाइ अग्रवालको छ । यो अन्य होटेलभन्दा विल्कुलै फरक हुनेछ । होटेलभित्र पस्ने बित्तिकै बार देखिन्छ । बारमै रजिष्ट्रर गर्ने, त्यही रमाइलो गरेर रुममा गएर सुत्ने गरी संरचना बनाइएको छ ।

मोक्सी होटेल ब्रान्डलाई काठमाडौंमा भित्र्याउन मेरियट इन्टरनेसनल र इन्टरनेसनल हिमालय हस्पिटालिटी एन्ड होटेलबीच सम्झौता भएको छ । पछिल्लोसमय नेपाली व्यवसायीहरूले होटेलमा लगानी बढाइरहेका छन् । ग्रुपको लगानीमा ठमेलमा पनि फेयरफिल्ड म्यारियट होटेल पनि सञ्चालनमा छ । तीनतारे स्तरको फेयरफिल्डको व्यवस्थापन मेरियटले गरिरहेको छ ।

एमएसअन्तर्गत एभरेष्ट सुगर एन्ड केमिकल्स लिमिटेड, हिमालय सुगर मिल्स लिमिटेड, रिलायन्स स्पिनिङ मिल्स लिमिटेड र भगवती स्टिल इन्डष्ट्रिज प्रालि सञ्चालनमा छन् ।

उत्पादनमूलक क्षेत्रमा लगानी गरेका व्यावसायिक घरनाहरूले हाल होटेलमा सम्भावना देखेर ठूलो लगानी खन्याइरहेका छन् । राजधानीलगायत देशका प्रमुख सहर र पर्यटकीय गन्तव्यहरूमा तारेस्तरका होटेल र रिसोर्ट खुल्ने क्रम बढेको छ । व्यवसायी मीनबहादुर गुरुङले आठ अर्ब रुपैयाँ लगानीमा पाँचतारे अन्नपूर्ण होटेल निर्माण सुरु गरेका छन् ।

यस्तै, गैरआवासीय नेपाली संघका पूर्वअध्यक्ष शेष घलेले पनि सेराटन होटेल बनाइरहेका छन् । शंकर ग्रुपले नक्सालमा पाँचतारे हिल्टन होटेल र व्यवसायी देशबन्धु बस्नेतले सुकेधारमा मक्र्युर होटेल पनि सञ्चालनमा ल्याइसकेका छन् ।