काठमाडौं । तनावपूर्ण बनेको नेपाल सुपर लिग (एनएसएल) २०२५ को पाँचौँ खेलमा साविक विजेता ललितपुर सिटी एफसीले पोखरा थन्डर्सविरुद्ध ३–२ को जित निकालेको छ । बुधबार त्रिपुरेश्वरस्थित दशरथ रंगशालामा सम्पन्न खेल दोस्रो हाफमा तनावपूर्ण बनेको थियो ।

त्यसअघि ११औँ मिनेटमा ललितपुरका जोनाथन जोरिल्लाले टोलीलाई अग्रता दिलाए । उनको कर्नर प्रहार सिँधै पोखराका गोलकिपर गुइलेमो प्रिसोको खुट्टामा लागेर गोल भएको हो । ४२औँ मिनेटमा मार्की समीर तामाङको गोलमा पोखरा खेलमा फर्कियो । आयुशले वायाँतर्फबाट गरेको क्रसमा नवयुग श्रेष्ठको हेडरलाई ललितपुरका गोलकिपरले बचाए पनि सोही रिबाउन्डलाई समीरले पोस्टको दिशा दिए । तर, पोखराको यो बराबरी लामो समय टिक्न भने सकेन ।

पहिलो हाफको इन्जुरी समयमा इमोह इजेकेलले गोल गर्दै साविक विजेतालाई पुनः २–१ को अग्रतामा राखे । जोनाथन जोरिल्लाले मध्यभागबाट निकालेको क्रसलाई इजेकेलले सेकेन्ड बारमा गोल गरे । ७५औँ मिनेटमा जोनाथनले नै ललितपुरको अग्रतालाई ३–१ को स्थितिमा पुर्‍याए । दायाँतर्फ ६ यार्ड बक्सबाट पोखराका पाँच रक्षकबीच निकालेको बललाई जोनाथनले ट्याप इन गर्दै जाली चुमाए ।

८२औँ मिनेटमा रेफ्री र पोखराका अफिसियलबीच विवाद हुँदा खेल तनावपूर्ण बन्यो । पोखराका टिमबाट सुन्दर थापा ८०औँ मिनेटमा रेफ्रीले गोललाइन पार गरेको बललाई गोल मान्यता नदिएको भन्दै फोर्थ अफिसियल उमेश बिडारीसँग विवादमा उत्रिँदा खेल करिब पाँच मिनेट तनावपूर्ण बनेको हो । बिडारी र थापाबीच धक्कामुक्कीको स्थिति बन्दा छुट्याउन पुगेका प्रतियोगिता निर्देशक सञ्जीव मिश्रलाई समेत थापाले तानेर पोखराको टेक्निकल लाइननजिक भुइँमा लडाए ।

यसपछि रंगशालामा खटिएका प्रहरी विवादबीच आउँदा उनीहरू र पोखराका अफिसियलबीच पनि भनाभन चलेको थियो । यसैकारण खेल करिब पाँच मिनेट रोकिँदा १० मिनेट इन्जुरी समय थपिएको थियो । इन्जुरी टाइममा जोए आइडोले गोल गर्दै पोखराको खेलमा फर्किने आशा जगाएका थिए । समीर तामाङले वायाँतर्फबाट निकालेको क्रसमा जोए आइडोले सुन्दर फस्र्ट टच गरे । तर, यसपछि थप गोल नहुँदा ललितपुरले ३–२ को रोमाञ्चक जित निकालेको हो ।

प्रतियोगितामा ललितपुरको यो पहिलो जित हो । ललितपुरले यसअघि पहिलो खेलमा काठमाडौं रेजर्ससँग २–२ को बराबरी खेलेको थियो । यता, पोखराको भने प्रतियोगितामा लगातार दोस्रो हार हो । पोखरा यसअघि पहिलो खेलमा एफसी चितवनसँग २–० ले पराजित भएको थियो ।