काठमाडौं । म्यानमारमा ७.७ म्याग्निच्युडको विनाशकारी भूकम्पपछि चीन, रुस, भारतजस्ता देशले आपत्कालीन टोली र मानवीय सहायता सामग्री पठाएर सहयोग गरिरहेका छन् । तर, संयुक्त राज्य अमेरिकाले अझै महत्त्वपूर्ण सहयोग उपलब्ध गराएको छैन । यसअघिका यस्ता विपद्‌मा अमेरिकाले नेतृत्वदायी भूमिका खेल्दै सबैभन्दा धेरै सहयोग गर्ने गरेको थियो ।

म्यानमारको घनाबस्ती भएको मध्यक्षेत्रमा गएको भूकम्पमा परी १७ सयभन्दा धेरै मानिसको मृत्यु भइसकेको छ । देशको सैन्य सरकारले मृतकको संख्या अझै बढ्न सक्ने जनाएको छ ।

यसबीचमा अमेरिकी राष्ट्रपति डोनाल्ड ट्रम्पले अमेरिकी सहयोग पठाइँदै छ भनेर आश्वासन पनि दिए । ट्रम्पको उक्त भनाइका बाबजुद अमेरिकाले सहयोग प्रदान गर्न तदारुकता देखाएको छैन ।

न्युयोर्क टाइम्सका अनुसार, यूएसएआईडीको तीन सदस्यीय टोली बुधबारसम्म पनि म्यानमार पुग्ने अपेक्षा छैन । विगतमा सहयोगमा अग्रणी भूमिका खेल्ने गरेको अमेरिकाको यो ढिलाइ असामान्य र यसअघिको प्रयाससँग स्पष्ट विरोधाभासका रूपमा टिप्पणी गरिएको छ ।

भूकम्पबाट सबैभन्दा बढी प्रभावित क्षेत्र मान्डलेमा चीनले उद्धार टोली पठाएको छ । र, १४ मिलियन डलरको सहयोग प्रदान गरेको न्युयोर्क टाइम्सले जनाएको छ ।