काठमाडौं । अफ्रिकाको एक च्यारिटी संस्था सेन्टेबालेकी अध्यक्ष सोफी चन्दौकाले बेलायतका प्रिन्स ह्यारीमाथि आफूविरुद्ध अत्याधिक उत्पीडन र धम्की दिएको आरोप लगाएकी छिन् । स्काई न्यूजमा आइतबार दिएको अन्तर्वार्तामा उनले यस्तो आरोप लगाएकी हुन् ।
  
चन्दौका अध्यक्ष रहेको संस्था सेन्टेबाले सह–संस्थापकहरू बेलायतका प्रिन्स ह्यारी र लेसोथोका प्रिन्स सेइसोले गत हप्ता ट्रस्टी बोर्डसँगै संर पदबाट राजीनामा दिएका थिए । २००६ मा स्थापित यो च्यारिटीले लेसोथो र बोट्सवानाका युवालाई एचआईभी/एड्स, आर्थिक असमानता र जलवायु प्रतिरोधजस्ता समस्याहरू समाधान गर्न मद्दत गर्दै आएको छ ।

प्रिन्स ह्यारी र प्रिन्स सेइसोले आफ्ना स्वर्गीय आमाहरू ब्रिटेनकी प्रिय राजकुमारी डायना र लेसोथोकी रानी मामोहाटोको सम्झनामा सेन्टेबालेको स्थापना गरेका थिए ।

दुई संस्थापक राजकुमारहरूको राजीनामाले संस्थाको भविष्यबारे प्रश्न उठाएको छ । र, उनीहरूको राजीनामा संस्थाको संचालनको विधिसम्बन्धी विवादमा केन्द्रित रहेको द न्यूज विक पत्रिकाले जनाएको छ ।

प्रिन्स ह्यारीले च्यारिटीको नेतृत्वलाई उचित सूचना नदिई सार्वजनिक रूपमा राजीनामा घोषणा गरेर उनको विरुद्ध समाजमा नकरात्मक दृष्टिकोण फैलाउन खोजिएको पनि चन्दौकाले दाबी गरेकी छन् ।

यसअघि प्रिन्स ह्यारी र प्रिन्स सेइसोले ब्रिटेनको प्रेस एसोसिएसनलाई संयुक्त विज्ञप्ति जारी गर्दै ह्यारी र सेइसोले च्यारिटीका ट्रस्टिहरू र अध्यक्षबीचको सम्बन्ध सुधार नहुनेगरी बिग्रिएकोले खराब अवस्था सिर्जना गरेको बताएका थिए । उनीहरूका अनुसार ट्रस्टिहरूले कर्मचारीहरूको हितलाई ध्यानमा राख्दै चन्दौकालाई पद छोड्न आग्रह गरे पनि उनले यो पदमा रहिरहन संस्थाविरुद्ध उल्टो मुद्दामामिला गरेको आरोप लगाएका थिए ।

तर, चन्दौकाले भने पदमा बसेर संस्थाको संस्थामा दमन, कमजोर कार्यकारी प्रबन्ध, शक्तिको दुरुपयोग, धम्की, उत्पीडन, स्त्रीद्वेष, अस्वेत महिलाप्रति द्वेषजस्ता विषयलाई उजागर गर्न साहस गरेको बताइन् । द न्यूज विक