काठमाडौं । मिडिया एलायन्स नेपालले शुक्रबार तीनकुनेमा भएको राजावादीको आन्दोलनमा पत्रकारको मृत्यु अधिनायकवादी सरकार, अराजक आन्दोनकारीका कारण भएको बताएको छ ।

सडक आन्दोलनको रिपोर्टिङ गर्ने क्रममा शुक्रबार एभिन्यूज टेलिभिजनका पत्रकार सुरेश रजकको मृत्यु भएको थियो । 

रिपोर्टिङ गरिरहेका पत्रकारहरूको सहयोगका लागि गरिएको पटक–पटकको आग्रहलाई सरकारी प्रशासन तथा सुरक्षा निकायले समयमा सम्बोधन नगरी अलोकतान्त्रिक चरित्र देखाएको एलायन्सकाे आरोप छ । 

मिडिया एलायन्स नेपालका अध्यक्ष स्वयंले प्रहरी महानिरीक्षकलाई बारम्बार सम्पर्क गरी घटनाका सम्बन्धमा आधिकारिक जानकारी माग्दा जवाफ नै नदिएको बताइएको छ ।  

“हामीले प्रत्यक्ष देख्यौं, घटनाका सम्बन्धमा सशस्त्र प्रहरी महानिरीक्षकलाई गलत जानकारी दिइँदै थियो । काठमाडौंका प्रमुख जिल्ला अधिकारीले प्रेससँग नबोल्न माथिको आदेश पाएका थिए,” एलायन्सले विज्ञप्ति जारी गर्दै भनेको छ, “प्रमुख जिल्ला अधिकारीलाई पटकपटक सम्पर्क गर्न खोज्दा पनि फोन नउठाउनु र सन्देश पठाउँदा पनि कुनै प्रतिक्रिया नदिनुले सोही तथ्य प्रमाणित गर्दछ ।” 

घटना भएको क्षेत्रमा सीसीटीभीहरू रहेका कारण सत्य बाहिर ल्याउन एलायन्सले आग्रह गरेको छ ।