काठमाडौं । इरानका मुख्य प्रशिक्षक अमिर घालेनोईले टोलीका स्ट्राइकर मेह्दी तारेमीको प्रशंसा गरेका छन् । उज्वेकिस्तानविरुद्ध मेह्दीको दुई गोलमा इरानले फिफा विश्वकप–२०२६ मा स्थान पक्का गरेपछि प्रशिक्षक घालेनोले सन्तुष्टि व्यक्त गरेका हुन् ।

“उत्कृष्ट खेलाडीले शारीरिक र प्राविधिक दुवैरूपमा सहयोग गर्नुपर्छ,” घालेनोईले भने, “तारेमी पनि तिनैमध्य एक हुन् । उनले स्वास्थ्य स्थिति राम्रो नभए पनि राष्ट्रिय टिमबाट खेले, राष्ट्रका लागि र समर्थकका लागि । उनी मैदानमा उत्कृष्ट खेलाडी बने, त्यसबाट खुसी छु ।”

इटालियन क्लब पोर्टाेमा आबद्ध भएयता चोटका कारण अस्थिर सिजन बिताइरहेका तारेमीले आफ्नो दुई गोलले गर्दा राष्ट्रिय टोलीमा स्थान बनाएका हुन् ।

आजाड रंगशालामामा सम्पन्न खेलमा उज्वेकिस्तानसँग २–२ को बराबरी हुँदा तारेमी एक्लैले दुई गोल गरेका थिए । उक्त खेलमा उनले ५२औँ र ८३औँ मिनेटमा गोल गरेका थिए । यसै बराबरीबाट इरानले फिफा विश्वकपकमा स्थान बनाएको हो ।