काठमाडौं । भक्तपुरको मध्यपुर थिमि नगरपालिका–९, बोडेस्थि नीलबाराहीको पिकनिक स्थलनजिक एकजना मृत भेटिएका छन् । पिकनिकस्थल नजिकैको पार्किङस्थलमा आज बिहान खोटाङका केपिलासगढी गाउँपालिका–२ का ६६ वर्षीय ओमप्रकाश राई मृत भेटिएका छन् ।

जिल्ला प्रहरी परिसर भक्तपुरका प्रवक्ता प्रहरी नायब उपरीक्षक (डीएसपी) ढुण्डिराज न्यौपानेले मृतक राईको दाहिने कानको छेउमा र टाउकोमा चोट देखिएको जानकारी दिए । उनी कबाडी सामान टिप्ने काम गर्दै आएका थिए ।

डीएसपी न्यौपानेका अनुसार, शव फेला परेको ठाउँमा रगत लतपतिएको ढुंगा पनि फेला परेको छ । “रगत लतपतिएको ढुंगा फेला परेको छ । घटनाको प्रकृति हेर्दा ढुंगा प्रहार गरी हत्या गरिएकोजस्तो देखिन्छ,” उनले भने ।

मृतकको राईका तीन छोराहरू रहेको डीएसपी न्यौपानेले बताए । थप अनुसन्धान भइरहेको प्रहरीले जनाएको छ ।